Partia Demokratike gjykon se e vetmja mënyrë për të ndarë krimin nga politika janë protestat. Në parapërgatitje për një të tillë më 18 shkurt, deputeti demokrat, Eduard Halimi tha se mjaft të shihet se si po veprohet me Elvis Roshin e Kavajës, i cili vijon ende të jetë në detyrë, edhe pse i është hequr mandati nga KQZ.
“Elvis Roshi vazhdon të jetë kryetar i Bashkisë së Kavajës dhe po kujdeset personalisht për organizimin e festivalit për fëmijë. KQZ ia hoqi mandatin Roshit dhe Rama duhet ta largonte menjëherë”, ka thënë Halimi, i cili më pas potencoi rrugën e protestave.
“E vetmja zgjidhje janë protestat që krimi të dalë nga politika. Në mënyrë që njerëz si Ervin, apo Elvis Roshi, i dënuar për përdhunim dhe trafik droge të mos kenë më mundësi të kthehen në politikë. Të gjithë në shesh më 18 shkurt”, tha deputeti demokrat.
Ndërkohë edhe sot, një pjesë e shtypit të djathtë kishte tituj që i referoheshin ngjarjeve në Rumani, duke i parë ato si të domosdoshme dhe në rastin e Shqipërisë. /tesheshi.com/
