Partia Demokratike nuk është regjistruar në zgjedhjet parlamentare të 18 qershorit duke zgjedhur të protestojnë në rrugë kundër standardeve që ofron qeveria për këto zgjedhje. Nga ana tjetër ajo duket se do të nisë dhe një betejë ligjore ndaj këtyre zgjedhjeve duke ankimuar procesin.
Vendimi i marrë sot nga KQZ-ja për prodhimin e 3 milionë e 518 mijë e 295 fletëve të votimit pritet të ankimohet nga juristët e PD-së në KQZ. Përfaqësuesi ligjor i Partisë Demokratike në KQZ, Ivi Kaso, i tha TCH se PD do ta ankimojë në Kolegjin Zgjedhor vendimin për miratimin e fletës së votimit.
Më parë PD pati paralajmëruar ankimimin në Kolegjin Zgjedhor të procedurave të KQZ-së për pranimin e listës së kandidatëve të partive që janë regjistruar në zgjedhje duke e konsideruar si shkelje ligjore pranimin e tyre më 29 prill.
Po sot ka pasur dhe një zhvillim tjetër lidhur me procesin zgjedhor.
Ambasadori Peter Tayler, i cili do të udhëheqë grupin e vëzhguesve në zgjedhjet parlamentare të 18 qershorit të dërguar nga OSBE/ODIHR tha se “vendimi për të marrë pjesë ose jo në zgjedhje i takon partive politike dhe ko nuk do të cënojë punën tonë”.
“Ne do të raportojmë për procesin. Opinioni ynë do të jepet në raportin pas zgjedhjeve”, tha Tayler./tesheshi.com
