Dalja e radhës për çështjen “Kajmaku” nga PD, ka qenë ajo me krahasimin e fotove në dy pasaporta, atë të Jorgo Totos kur është arrestuar(emrin e të cilt ka mbajtur dikur Agim Kajmaku në Greqi), si dhe atë të Kajmakut me emrin e tij në pasaportën shqiptare. Me pretendimin se është i njëjti person, pra njeriu që ka marrë drejtimin e Bashkisë së Vorës, deputeti Strazimiri, i cili kishte radhën për të denoncuar nga podiumi i selisë blu, deklaroi:
“Ky dokument, i marrë nga sistemi TIMS (dokumenti 1) është me foton e Jorgo Totos në pasaportën me nr. Z 0148497, me të cilën dhe është arrestuar. Dokumenti i dytë është po ashtu i nxjerrë nga sistemi TIMS tregon pasaportën me emrin Agim Kajmaku, por me të njëjtën foto si edhe Jorgo Toto në pasaportën me të cilën është arrestuar. Krahasimi i dy fotove që janë të të njëtit person, vërteton se personi i kërkuar nën emrin Jorgo Toto, në fakt është Agim Kajmaku”, deklaroi Strazimiri.
Deri më tani, që kur dolën dokumentat greke,vetëm Kajmaku ka reaguar, duke u përbetuar për të kundërtën, ndërsa nga PS asnjë reagim. Zero nga vetë Rama, ndryshe nga rasti i Valdrin Pjetrit, ku u përgjigj flakë për flakë, më shumë ndaj vetë Valdrinit se sa ndaj PD-s që ia zbuloi detajin e rëndë të së kaluarës. /tesheshi.com/
