PD e gatshme të bashkëpunojë me LSI kundër Ramës: reforma zgjedhore, të ndryshojë edhe harta territoriale
Partia Demokratike shprehet e hapur të bashkëpunojë me Lëvizjen Socialiste për Integrim.
Nënkryetari demokrat Edi Paloka tha se kundër kësaj qeverie, duhet të bashkëpunohet jo vetëm me LSI-në por me çdo qytetar.
Paloka tha se gjatë proçesit të reformës zgjedhore do të kërkohet edhe ndryshimi i hartës territoriale.
Sipas tij, Partia Demokratike është e hapur të bashkëpunojë më LSI-në dhe çdo qytetar të këtij vendi, për të larguar këtë qeveri, që siç thotë ai, është më e keqja në histori.
“Sigurisht ne jemi të hapur jo vetëm të bashkëpunojmë me LSI-në por me çdo qytetar i cili është gati të bëhet pjesë e një fronti të gjerë kundër një qeverisjeje, që mund të jetë më e keqe që ka pasur ndonjëherë Shqipëria.
Reforma territoriale siç ne e kemi denoncuar më se një herë për ne është kryer në atë formë vetëm për arsye politike dhe sigurisht që jo vetëm nuk dha rezultatet, për të cilat u premtua nga Rama, por përkundrazi pati efekte krejtësisht negative.
Sot është domosdoshmëri jo thjesht për faktin që kemi të bëjmë me një hartë krejtësisht elektorale, por edhe për faktin, sepse qytetarët nuk po arrijnë të marrin asnjë nga shërbimet që kanë marrë dikur nga pushteti lokal”, tha Paloka. /tesheshi.com/
