Sekretari Organizativ në PD, Enno Bozdo, duke folur sot për çështjen “Skavica”, ka akuzuar qeverinë se i ka dalë në pah mashtrimi me këtë çështje, ndërsa bëri të ditur se Partia Demokratike kërkon hetim administrativ.
“Të kapur në mashtrim, paligjshmëri e korrupsion me aferën Skavica, qeveritarët kundërshtojnë njëri tjetrin, ose më saktë njëra palë i kundërvihet palës tjetër”,- tha Bozdo, ndërsa kujtoi se dje Gjiknuri doli kundër Ramës dhe se opinioni publik e pa qartë aferën korruptive që kjo qeveri donte të ndërmerrte me Skavicën, pasurinë më të madhe të shqiptarëve.
“Si rezultat i denoncimeve të Partisë Demokratike dhe presionit publik, qeveria u tërhoq dhe pranoi më në fund se ajo ka në dispozicion një studim profesionist të vitit 2009. Ky studim përcakton qartë cili është opsioni më i mirë për të ndërtuar Skavicen, në dobi të interesit publik”,- deklaroi Sekretari Organizativ.
Ai shtoi se e gjithë procedura e marrjes në konsiderate të studimit të kompanisë Syzer dhe dhënia e bonusit kësaj kompanie, pa transparencë, por si rezultat i bisedimeve sekrete, del qartë që është një korrupsion i pastër.
“Në këto kushte, Partia Demokratike kërkon të shfuqizohet Vendimi që i ka dhënë bonus prej 8 pikesh klompanisë Syzer. Kërkojmë një hetim administrativ të mirëfillte, për të zbardhur këtë aferë korruptive. Ministri Gjiknuri duhet të mbaje përgjegjësi për fshehjen e studimit mbi Skavicën”, u shpreh ndër të tjera Enno Bozdo. /tesheshi.com/
