Partia Demokratika ka vendosur që të mos lejojë zhvillimin e asnjë séance normale në parlament, përfshirë dhe komisionet, deri më 28 qershor, ditën kur vendoset për çeljen ose jo të negociatave. Kështu është vendosur sërish në mbledhjn e grupit të PD-së.
Shkak është ai, Fatmir Xhafaj, dorëheqjen e të cilit opozita e kërkon më ngulm. Referimi gjithashtu po ai: vëllai i tij i kapur në një audiopërgjim duke folur për afera droge.
Por ajo, kaseta me zërin e pretenduar të Agron Xhafajt, nuk përmendet më nga PD. Mazhoranca është e bindur se kemi të bëjmë me një sajesë, e për këtë arsye, e ka përkthyer fushatën ndaj Xhafajt si një shantazh ndaj shtetit.
Por opozita nuk tërhiqet, e do më patjetër “kokën” e tij. “Keni dhe 23 ditë kohë”, paralajmëroi deputetja luftarake, Albana Vokshi. /tesheshi.com/
