Partia Demokratike dhe LSI janë bërë bashkë në kërkesën për përjashtimin e kryeministrit Edi Rama për 10 ditë nga punimet e Kuvendit të Shqipërisë.
Kërkesa është firmosur nga deputetët e dy grupimeve parlamentare në opozitë.
Pretendimi i demokratëve është që kryeministri Edi Rama ka ofenduar deputetin demokrat Sali Berisha, gjatë kohës që ai po fliste në foltoren e Kuvendit.
Në një reagim jashtë sallës së Kuvendit, Berisha akuzoi Ramën se është i vetmi person që po tenton të shkatërrojë Parlamentin.
Ndërsa, në një prononcim për mediat jashtë sallës së Kuvendit, Berisha është shprehur se këtu po i mohet e drejta e fjalës opozitës.
“Vetëm një njeri që do të shkatërrojë parlamentin shqiptar dhe ky është Edi Rama, këta kanë frikë dhe nga parlamenti. Cënimin më të madh do ta paguajnë ata vetë, s’ka ndodhur kurrë në histori që në mënyrë kaq të vendosur të mos respektohet e drejta e fjalës për proçedurë si sot.
S’kanë asnjë rëndësi ato të tjerat, kanë proçedurën e vet, për atë se si mund të më ofendojë mua Rama? Problemi themelor është kjo se kemi të bëjmë me mohimin e të drejtës. Mazhoranca ka një skenar për të mashtruar qytetarët, gjithçka filloi me mohimin e të drejtës së fjalës”, tha Berisha. /tesheshi.com/
