Partia Demokratike do të dërgojë në gjykatën Kushtetetuese ligjin që sipas saj, ndalon hetimin ndërkombëtar të skandalit të CEZ, skandal që sipas opozitës së sotme, mund të quhet edhe “vjedhja e shekullit”.
Deputeti demokrat, Eduart Halimi tha se partia e tij do të dërgojë në Kushtetuese marrëveshjen e zgjidhjes me mirëkuptim të konfliktit mes qeverisë dhe kompanisë CEZ.
Me anë të një deklarimi për mediat, Halimi bëri përgjegjës kryeministrin Rama dhe kreun e Kuvendit Meta për skandalin e humbjes së miliona eurove në zgjidhjen e konfliktit me CEZ.
Qeveria e cilësoi çështjen të mbyllur me mirëkuptim, kur vendosi të mos I drejtohej Arbitrazhit për zgjidhjen e konfliktit, ndërsa opozita mendon se janë shkaktuar deri në 3 miliardë dollarë dëme për shkak të shkatërrimit me dashje, si thotë, të operatorit të shpërndarjes së energjisë.
“Partia Demokratike argumenton qartë në kërkesën e saj se ky akt dëmton interesat financiare të shtetit shqiptar dhe ngarkon me borxh të tmerrshëm çdo qytetar të vendit, dhe kjo si pasojë e drejtpërdrejtë e aferës më të madhe korruptive të Edi Ramës dhe Ilir Metës”, deklaroi në një dalje për mediat mbrëmjen e së enjtes, deputeti demokrat, Eduard Halimi.
PD do të nisë punën edhe për të kërkuar hetim ndërkombëtar për aferën, e pritet që opozita të dorëzojë sot projektligjin për këtë qëllim. /tesheshi.com/
