Partia Demokratike ka nisur denoncimet ndërkombëtare në lidhje me atë që e quan manipulimin e zgjedhjeve të 25 qershorit. Ka qenë deputeti demokrat, Tritan Shehu, që gjatë fjalës së mbajtur në Asamblenë e Këshillit të Europës, tha se shit-blerja e votave është bërë me një grup të gjerë kriminal. Ai tha se qeveria socialiste nuk ka vullnet për organizmin e zgjedhjeve me standarde.
“Raporti i vëzhguesve të Asamblesë Parlamentare të KiE ashtu si edhe raporti përfundimtar i OSCE/ODIHR për zgjedhjet parlamentare të 2017, kanë konstatuar përkeqësimin serioz të standarteve të zgjedhjeve në Shqipëri.
Ndërsa në vitin 2009 zgjedhjet u cilësuan se kishin arritur shumicën dërrmuese të standarteve ndërkombëtare, zgjedhjet e vitit 2017 kanë cenuar rëndë një numër të standarteve bazë.
Vëzhguesit ndërkombëtare kanë konstatuar shit-blerje masive të votës nëpërmjet përdorimit të parave kriminale që vijnë nga trafiqet e drogës dhe korrupsioni galopant. Shpesh, ky fenomen është përdorur për të supresuar pjesëmarrjen në votim të votuesve të opozites, kundrejt marrjes me anë të pagesës të dokumentit të identitetit të nevojshem për votim. duke penguar në thelb të drejtën për të votuar”, tha Shehu.
Sipas tij, vëzhguesit kanë konstatuar numër të lartë të presionit ndaj zgjedhesve për të marrë pjesë në fushate dhe për të votuar në favor të partise në pushtet, Partia Socialiste, nëpërmjet kërcënimit me humbje të vendit të punës në administratën publike.
“Shitblerja e votës dhe presioni janë kryer në bashkëpunim me një rrjet të gjerë kriminal, që kontrollon kultivimin dhe trafikun e kanabisit si dhe te drogave të tjera të forta”, tha ai. /tesheshi.com/
