Partia Demokratike ka vendosur të luajë fort duke bojkotuar zgjedhjet e pjesshme për Bashkinë Kavajë të cilat i kishte kërkuar vetë pasi Lulzim Basha i ka kërkuar zyrtarisht kryeministrit Edi Rama shkarkimin e tashmë ish-kryebashkiakut Elvis Rroshi.
Edi Paloka, kreu i grupit parlamentar të PD-së, deklaroi sot se “nuk do të ketë zgjedhje në Kavajë”, që politikisht përkthehet me bojkot por dhe në mosnjohje të procesit dhe rezultatit.
PD po vë në zbatim një eksperiment që sipas gjasave do ta aplikojë edhe në zgjedhjet e përgjithshme të 18 qershorit.
Ka qenë i menjëhershëm reagimi i kryeministrit Edi Rama që deklaroi ndihet i keqardhur për bojkotin e opozitës, por tha se nuk do të ketë tërheqje dhe se zgjedhjet do të zhvillohen. Presidenti Nishani ka dekretuar 7 majin si ditën e zgjedhjeve të parakohshme për Bashkinë e Kavajës pas heqjes së mandatit të Elvis Rroshit. /tesheshi.com/
