Ambjentalistë dhe përfaqësues të djathtë në departamentin e Mjedisit kanë kërkuar ndërprerjen e projektit të TEC-it që do përdorë torfën e Maliqit. Kërkesa e tyre erdhi përmes një konsultimi edhe me qytetarë të Korçës, në lidhje me projektligjin, për të kthyer 288 hektarë tokë bujqësore në zonë minerale për përdorimin e torfave të Maliqit, për prodhim energjie në TEC me kapacitet 500 MW, pasi është e rrezikshme për shëndetin e banorëve.
“Torfa është mbetje natyrale e kënetave, e cila pas përpunimit për energji çliron lëndë helmuese, më e dëmshme se dioksidi i karbonit. Për këtë arsye, dhjetëra intelektualë, pedagogë dhe përfaqësues të shoqërisë civile në Korçë, Maliq dhe Devoll shprehën pakënaqësi në lidhje me këtë projektligj, që është kaluar pa asnjë transparencë për publikun. Eshtë mbajtur i fshehtë për këshillat bashkiake të Maliqit dhe të Devollit. Pjesmarrësit kërkuan mbajtjen e debateve publike dhe konsultimeve të gjera me grupet e interesit. Intelektualë dhe agronomë të Korçës theksuan se mungesa e transparencës lë shumë pikëpyetje mbi dëmet ekologjike që shkakton tymi dhe mbi 50 milionë ton hi që mbeten pas prodhimit”, kanë theksuar ekspertët.
Pjesëmarrësit në këtë takim firmosën peticionin ku i kërkojnë parlamentit të pezullojë miratimin e këtij projektligji derisa të kryhen seanca të plota të konsultimeve me publikun, të detyrojë komisionet parlamentare të dëgjojnë zërin e ekspertëve, këshilltarëve bashkiakë dhe të banorëve, dhe të detyrojë qeverinë që të kryejë studime të thelluara për vlerësimin strategjik mjedisor, për vlerësimin e ndikimeve sociale, për përcaktimin e teknologjisë dhe shpërndarjes së tymrave në ajër, dhe rrugëzgjidhjes për gati 50 milione ton hi që do të krijohet nga një TEC i mundshëm.
Nga ana tjetër, në seancën e sotme parlamentare, nënkryetari i PD-së, Edmond Spaho ngriti edhe një tjetër çeshtje sa i takon nivelit të ndotjes në Elbasan. “Sejdini ka shtuar ndotjen në Elbasan, për interesa klienteliste”, tha Spaho. Ai ka apeluar kryeparlamentarin Meta e Shpëtim Idrizin të mos negociojnë më Ramën për kalimin e ligjit për mbetjet. /tesheshi.com
