Partia Demokratike ka akuzuar sot kryetarin e bashkisë së Tiranës, Erion Veliaj, për kryerjen e dy veprave të rënda penale në një ditë që kanë të bëjnë me falsifikim dokumentesh dhe shpërdorim detyre.
Anëtari demokrat në Këshillin Bashkiak, Fabian Topollaj u shpreh se inspektori Besmir Karaj, zbuloi shkeljet e rënda të Veliajt, në përpjekjen e tij të dëshpëruar për të fituar simpatinë e shefit të tij, duke i vendosur gjobë popullit protestues.
“Deri dje, akti i Veliajt ishte komik dhe qesharak, dhe mbarë opinioni publik janë tallur me të. Por nga dje, rezulton se kemi të bëjmë me shkelje serioze të ligjit, dhe me dy vepra të rënda penale, falsifikim dokumentesh dhe shpërdorim detyre. Tashmë në prokurorinë e Tiranës ka një kallëzim penal të kryer nga inspektori Karaj”, u shpreh Topollaj.
Ai kërkoi që prokuroria të hetojë me shpejtësi dhe të nxjerrë përgjegjësitë e Veliajt para ligjit./tesheshi.com/
