Partia Demokratike tha se në krye të Arkivës së Shtetit, është emëruar një i përjshtuar nga radhët e policisë, duke zgjeruar kështu rrethin e akuzave për inkriminim të administratës.
Sipas deputetit Genc Pollo, kreu i Arkivës, Gjet Ndoji, në vitin 2000 është përjashtuar nga radhët e policisë me disa akuza. Pollo renditi mes këtyre akuzave mospastrim të radhëve nga të inkriminuarit, përgjegjësi për grabitjen e Bankës, përgjegjësi për vjedhjen e makinave, përgjegjësi për shkelje në zyrën e pasaportave dhe vizave.
“Të gjitha këto zullume ky major i ka bërë kur ishte kryesisht si shef i komisariatit të Kukësit dhe për këtë është përjashtuar nga policia me motivacionin që lexova nga ministri i Brendshëm i asaj kohe, Spartak Poçi. Pavarësisht kësaj të kaluare, pavarësisht se është kryetar partie, ç’ka e ndalon specifikisht ligji i Arkivave, neni 90 i tij, u shpërblye nga rilindistët si drejtor i Përgjithshëm Arkivës Qendrore të Shtetit”, tha Pollo.
Ai denoncoi edhe largimin e 51 arkivistëve me përvojë që u zëvendësuan, sipas tij, nga të afërm të Ndojit duke e përfunduar deklaratën për mediat me rëndësinë që merr procesi i dekriminalizimit në këtë situatë. /tesheshi.com/
