Partia Demokratike akuzoi ministrin e Brendshëm, Saimir Tahiri se ka shkarkuar një numër të madh oficerësh policie pasi këta të fundit kanë shoqëruar kunatin e Ministrit të Brendshëm.
“Një muaj më parë, një biznesmen në Tiranë denoncoi publikisht dhunën e ushtruar ndaj tij dhe djalit të tij nga policia në qendër të Tiranës, për shkak të një gjobe të papaguar të automjetit.
Edhe pse ai dëshmoi me prova dhunën brutale tej çdo kufiri të policisë, Saimir Tahiri nuk mori asnjë masë dhe askush nuk mbajti përgjegjësi”, nisi denoncimin Enkelejd Alibeaj.
Por nëse dikush, qoftë ky një polic, prek kunatin e Saimir Tahirit, ai flaket në rrugë dhe këtu i jepet fund karrierës së tij, siç ka ndodhur këtë fundjavë në Tiranë, kur 7 oficerë policie janë flakur në rrugë, pasi reaguan ndaj kunatit të Tahirit, për shkak të një aksioni pas sinjalizimit për praninë e një personi të armatosur”, deklaroi shefi i sektorit të sigurisë në PD, Enkelejd Alibeaj.
Por Alibeaj nuk jep më tej asnjë emër se për këtë person bëhet fjalë, pra që është kunati i ministrit, dhe se ku ka ndodhur incidenti apo përplasja me të. Madje i takon të japë dhe ndonjë emër polici të shkarkuar, kjo, për ta bërë më bindëse denoncimin.
Partia Demokratike është një parti e madhe, dhe si e tillë, ajo duhet të disponojë burime dhe struktura që ta “qepin mirë” denoncimin. Ndryshe, ngjan akuzë si për ditë të diele
Por kjo nuk e bën të pavërtetë lajmin. Është plotësisht e saktë që ka ndodhur një incident me kunatin e ministrit Tahiri, që orët në vijim do zbardhen arsyet e përfshires së tij në një incident policor. /tesheshi.com/
