Reali i Madridit duket se ka ndejtur “urtë” këto javë të merkatos së futbollit. Kampionët e Europës nuk kanë “lëvizur” fort për të sjellë lojtarë të tjerë cilësorë.
Blerja e të riut Ceballos është e vetmja goditje për perspektivën dhe duket sikur rekordmenët e Champions Leagues, nuk kanë nevojë për përforcime të rënda. Por e vërteta nuk është fare siç duket në publik.
Mediat britanike zbulojnë se madrilenët po lëvizin intensivisht, për të risjellë në Spanjë, portierin e Manchester Junajtid, De Gea.
“Dorëpërkulja” me ekipin e Mourinjos vijon prej ditësh, por tratativa është nisur. Nga ana tjetër, po për repartin e prapavijës, një tjetër portier ka marrë vëmendje nga Los Blancos. Bëhet fjalë për Kasper Shmaikel, djalin e legjendës Piter Shmaikel.
Ndërsa ka rënë në sy në sezonet e fundit për pritje të mrekullueshme, duke mbrojtur portën e Leicester, Shmaikel nuk e ka fshehur dot ëndrën për të mbrojtur portën e Realit. Por porta nuk është i vetmi “sektor” ku madrilenët “po lëvizin”.
Kylian Mbape është ende në krye të listës së dëshirave të Florentino Perez, ndërkohë që pritet edhe “vula” që Ronaldo do t’i vërë deklaratave për qëndrimin e tij ose jo në Madrid. Në varësi të kësaj përgjigjeje, Reali do të veprojë edhe në merkato.
Duke nisur mbase nga Gareth Bale, që sikur “i ka dalë nga zemra” tifozëve…Por ndërkohë, ecejaket e agjentëve dhe talent-skautëve, sa vijnë e intensifikohen në Madrid. /tesheshi.com/
