Në minutat e fundit të afatit për lidhjen e koalicioneve ka ndodhur e papritura në politikën kosovare.
Ramush Haradinaj, njeriu i cili u deklarua se nuk bën koalicione parazgjedhore me dy partitë që kanë qeverisur së fundmi PDK-LDK, ka ngrënë fjalët pasi partia e tij AAK-ja dhe NISMA e Fatmir Limajt, në mesnatën e së mërkurës kanë lidhur koalicion parazgjedhor me partinë e Kadri Veselit, duke befasur të gjithë opinionin, për faktin se është pritur të lidhin koalicion pas zgjedhjeve e jo para.
Lidhjen e koalicionit me PDK-në, Muharrem Nitaj, zëdhënës i AAK-së, e ka arsyetuar me faktin se Ramush Haradinaj, do jetë kandidat për kryeministër i koalicionit parazgjedhor.
“Është zgjidhje e imponuar”, deklaroi Nitaj në një konferencë të mbajtur në ora 01:00 të mesnatës së mërkurës, duke shtuar se është bërë për të mirën e vendit.
Ndërsa sekretari i AAK-së, Blerim Kuçi ka thënë se ky koalicion është kundërpërgjigje ndaj koalicioneve që lidhën LDK e AKR, pasi sipas tij vendi nuk duhet lënë të qeveriset nga Isa Mustafa dhe Behgjet Pacolli.
Për koalicionin ka mbajtur një konferencë pas orës 01:00, edhe PDK ku nënkryetari i saj, Enver Hoxhaj tha se koalicioni me AAK-në është lidhur për interesat e qytetarëve të vendit para atyre personale.
“Qytetarët e Kosovës meritojnë të kenë vend udhëheqës që mund ta udhëheqë vendin me guxim, që të krijojnë vende pune, udhëheqës që sjellin zhvillim ekonomik menjëherë. Kjo është arsyeja përse Kadri Veseli dhe Ramush Haradinaj janë bashkuar. Së bashku do të jetësojmë fillimin e ri për Kosovën”, ka thënë Hoxhaj.
Bilall Sherifi, nga NISMA në një konferencë të mbajtur në ora 01:20 ka thënë se partia e tyre nuk ka lëvizur dhe vetëm mbështet Haradinajn për kryeministër.
“Ju të gjithë e dini se Nisma që nga fillimi i koalicioni, ka mbështetur Haradinajn për kryeministër. Pas i është kërkuar që të marr një përgjigje, ai ka kontaktuar me Fatmir Limajn për këtë ofertë dhe në mbrëmje kemi dhënë vendimin që të mbështesim Ramush Haradinajn për kryeministër në koalicion me PDK-në”, ka thënë Sherifi.
Reagojnë LDK dhe VV
Ndaj bashkimit të tri partive në fjalë ka reaguar, LDK dhe Lëvizja Vetëvendosje.
Zëdhënësi i LDK-së, Arban Abrashi ka thënë se është diçka që e kanë pritur.
“Është përfolur edhe më herët për planin B të bllokut tjetër, por besoj se do të dalim fitues. E kemi pritur që kjo të ndodhë pas marrëveshjes me AKR-në, sepse frika ka qenë e madhe. Këta kanë reaguar në reaksion kësaj frike që e kanë pasur. Por jemi të bindur që koalicioni ynë do të dalë fitues. Ka pasur lidhje me mocionin dhe këtë koalicion, po shihen numrat, po shihet votimi. Por kjo ka zgjuar vëmendjen e qytetarëve, edhe programi ynë edhe koalicioni ka zgjuar frikën tek kundërshtarët. Kandidati ynë e shpie Kosovën në Evropë”, ka deklaruar Abrashi.
Kurse sekretari Dardan Molliqaj ka thënë se partia e Ramushit dhe Limajt vetëm kanë zyrtarizuar një koalicion të ditur më herët.
“Ka kohë që e kemi thënë se AAK dhe NISMA moti kanë bërë koalicion me PDK-në. Që në kohën kur e tradhëtuan opozitën e bashkuar. Sonte vetëm e zyrtarizuan koalicionin! Çdo minutë më shumë po definohet se kush e ka përnjëmend kauzën për ndryshime në Kosovë”, ka thënë Molliqaj. /tesheshi.com/
