Një Dimitri Payet i jashtëzakonshëm u ka dhënë fitoren “gjelave” pikërisht atëherë kur mendohej se ballkanasit do të merrnin një pikë të çmuar.
Përndryshe, Rumania ka bërë një paraqitje për t’u admiruar, të ndëshkuar vetëm nga ai gol fantastik i i lojtarit të West Ham-it.
Lojtari i ndeshjes u bë i pari futbollist francez pas Thierry Henry-t, në vitin 2000, që shënon një gol në një ndeshje të finaleve të Europianit dhe jep një pasim për gol.
“Ai tregoi dëshirë të jashtëzakonshme. Ai ishte pikërisht lojtari që e shtyu ekipin përpara,” do të thoshte Henry në rolin e komentatorit.
“Çfarë goli nga lojtari më i mirë në fushë,” do të qe reagimi i Gary Lineker-it për atë rrjetë të tundur në mënyrë fantastike në minutën e 89-të nga Payet.
Franca fitoi 2-1 ndaj Rumanisë në ndeshjen hapëse të Euro 2016-tës. Pjesa e parë do të mbyllej 0-0, ndërsa vendasit e patën të vështirë t’u imponoheshin rumunëve, edhe pse Griezmann mund të kishte shënuar.
Barazpesha u prish në pjesën e dytë, në minutën e 57-të, kur Giroud shënon për francezët. Tetë minuta më pas do të vinte barazimi për rumunët. Stancu kthen në gol një 11-metërsh.
Dhe ndeshja dukej se po shkonte drejt një barazimi, kur një minutë para përfundimit të lojës së rregullt, Payet godet mjeshtërisht me të majtën e tij nga jashtë zonës, prirët me portën, duke e çuar topin në trekëndëshin e sipërm në të djathtë të portës rumunase. Tatarusanu, portieri i Rumanisë, detyrohet veç ta ndjekë topin me sy. 2-1 për Francën!
Nesër, po për grupin A, është radha e Shqipërisë dhe Zvicrës të përballen mes tyre. /tesheshi.com/
