Pavel Nedved do të rikthehet të luajë zyrtarisht futboll në moshën 45 vjecare. Lajmi i çuditshëm vjen nga Republika Çeke, më saktë nga klubi i kategorisë inferiore, FK Skalna.
Klubi njofton në faqen zyrtare se ka firmosur një kontratë me Nedved, i cili do të luajë për ngjyrat e kësaj skuadre. Zëvendëspresidenti aktual i Juventusit, e ka pranuar kontratën dhe gjithçka është zyrtarizuar.
Por më pas, mediat kanë dhënë sqarime për ata që janë surprizuar nga një lajm i tillë. FK Skalna është klubi ku “Furia çeke” është rritur dhe ku luan aktualisht djali i tij, Pavel Junior.
Bashkë me presidentin e kësaj skuadre, Nedved është mik fëmijërie dhe të, kanë vendosur të luajnë sërish bashkë, por edhe bashkë me djemtë e tyre. Pra dy baballarët dhe dy fëmijët e tyre do të jenë në një skuadër, për një ndeshje të vetme.
Por që ndeshja të konsiderohej zyrtare, duhej një kontratë e rregullt dhe ajo është nënshkruar, vetëm për një ndeshje, me opsionin, që nëse Nedved do të ketë kohë të lirë nga impenjimet me Juventusin, të luajë sërish.
Në këtë mënyrë, për ata që i ka marrë malli për të parë sërish në fushë ish-topin e artë, do të kenë një tjetër mundësi.
Edhe Pavel e ka treguar se kur zbret në fushë, pavarësisht moshës, di të luajë me pasion dhe vrull. /tesheshi.com/
