Katër vite të kaluara nën presionin e masava të kursimit për shkak të krizës ekonomike nuk i kanë penguar votuesit portugezë të votojnë edhe një herë tjetër për koalicionin që qeveris aktualisht Portugalinë.
Zgjedhjet e përgjithshme të zhvilluara dje kanë nxjerrë fitues koalicionin e qendrës së djathtë, të drejtuar nga kryeministri i vendit, Pedro Passos Coelho. Kështu, ai bëhet i pari kryeministër në Europë që rizgjidhet pasi ka zbatuar për vite me radhë masat shtrënguese të parashikuara nga paketa e shpëtimit.
Veçse kryeministri ka humbur shumicën parlamentare.
Koalicioni qeveritar ka marrë gati 37 për qind të votave, një shifër e barabartë me 99 vende në parlamentin me 230 deputetë. Të majtët e Partisë Socialiste nuk kanë shkuar më shumë se 32 për qind, apo, ndryshe, ata kanë siguruar 85 vende në parlament.
Rezultatet paraprake paralajmërojnë një situatë të paqëndrueshme në vend, pasi të majtët janë në gjendje t’i bllokojnë me votë iniciativat e qeverisë.
Sipas një analisti të njohur, Antonio Barroso-s, rezultatet e zgjedhjeve të së dielës “nuk janë aq shumë një fitore për qeverinë, sesa një humbje për socialistët”.
Kryeministri në detyrë, Coelho, deklaroi se qeveria e tij është e vendosur t’u përmbahet rregullave fiskale të eurozonës. “Kohët përpara do të jenë sfiduese,” deklaroi ai.
Antonio Costa, udhëheqësi socialist, e pranoi humbjen, por e paralajmëroi qeverinë se duhet të ndryshojë sjellje tani që ka humbur shumicën. Në të njëjtën kohë, ai e bëri të qartë se nuk do të kërkojë ta bëjë vendin të paqeverisshëm. /tesheshi.com/
