Në Vlorë u mbajtën ceremonitë e rastit për 110-vjetorin e Pavarësisë, ku krerët e Shqipërisë u shfaqën para monumentit të themelimit të shtetit shqiptar me në krah ata të Kosovës, dyshen Kurti-Osmani.
Presidenti Begaj, fjalëmbatësi kryesor, tha se “nëse para 110 vite para diskutohej copëzimi i trojeve shqiptare, sot Shqipëria luan një rol të rëndësishëm për ruajtjen e paqes dhe sigurisë në OKB”.
“Në fillim të dhjetorit për herë të parë, mblidhet samiti i BE, kjo shënjon një ngjarje të madhe dhe është një përgjegjësi për rrugëtimin e Shqipërisë dhe europën, mesazh mbështetje për shqiptarët për vijimin e reformave dhe avancimin e axhendës europiane. Kemi rrugë të gjatë përpara, ta duam atdheun me vepra shërbim e idealizëm si patriotët e mëdhenj që nderojmë sot. Shqipëria ka detyrim të mbështesë shqiptarët kudo ku jetojnë”, theksoi kreu i shtetit.
Ai iu qas më pas gjysmës tjetër të kombit. “Shqipëria mundet dhe duhet të mbështesë fuqizimin e shtetit të Kosovës në çdo drejtim, të jetë zëri i saj sa herë të jetë e nevojshme; bashkëudhëtare dhe mbështetëse e palëkundur e rrugëtimit të saj Euro-Atlantik”, theksoi Begaj. /tesheshi.com/
