Sekretari amerikan i Shtetit, Antony Blinken, ka thënë se prioritetet e SHBA-së dhe Kosovës janë forcimi i sigurisë dhe stabilitetit në Kosovë dhe në Ballkanin Perëndimor, si dhe normalizimi i marrëdhënieve me Serbinë, me në qendër “njohjen reciproke”.
“Këtë vit, SHBA-ja dhe Kosova riafirmuan partneritetin e tyre të fortë dhe përkushtimin e përbashkët për demokracinë në Kosovë në përballjen me sfidat e reja në mjedisin e sigurisë evropiane”, tha ai me rastin e 15-vjetorit të shpalljes së Pavarësisë së Kosovës.
“Përparimi i Kosovës gjatë 15 viteve të pavarësisë është i jashtëzakonshëm për hapat e saj të mëdhenj në zhvillimin e një demokracie të qëndrueshme, multietnike, gjithëpërfshirëse”, ka thënë Blinken në një mesazh urimi drejtuar zyrtarëve të Kosovës.
Ai tha se Uashingtoni e mbështet fuqishëm propozimin franko-gjerman për normalizimin e marrëdhënieve ndërmjet Serbisë dhe Kosovës, i cili së fundmi është propozuar me mbështetjen e Bashkimit Evropian, i cili do të përmirësojë ndjeshëm stabilitetin rajonal dhe integrimin evropian dhe euroatlantik.
Blinken vlerësoi progresin e Kosovës në “promovimin dhe përmirësimin e vlerave demokratike dhe forcimin e institucioneve për qeverisje të mirë, sundim të ligjit dhe mundësi ekonomike për të gjithë qytetarët”, thuhet në faqen zyrtare të Departamentit të Shtetit.
Ai shprehu mirënjohjen për Kosovën për sigurimin e strehimit për emigrantët nga Afganistani dhe për një përgjigje të vendosur ndaj luftës brutale dhe të paprovokuar të Rusisë kundër Ukrainës. /tesheshi.com/
