Në bazë të një vendimi të marrë nga qeveria e Kosovës, të gjitha patundshmëritë në emër të ish-Republikës Socialiste Federative të Jugosllavisë, përkatësisht të ish-Republikës Socialiste të Serbisë, që ndodhen në vendin tonë, do të regjistrohen si prona të Kosovës.
Vendimi është nënshkruar nga kryeministri, Isa Mustafa.
Agjencia e Kadastrit është autorizuar të regjistrojë të drejtën e pronës dhe të bëjë regjistrin e të drejtave pronësore brenda afatit të përcaktuar ligjor.
Ndaj këtij vendimi ka reaguar Lista Serbe duke e quajtur represion të vazhdueshëm ndaj serbëve të Kosovës.
Kryetari i kësaj partie, Slavko Simiq ka kërkuar që vendimi të tërhiqet menjëherë.
“Vendimi i qeverisë së Kosovës është tendencioz dhe paraqet tentim që përmes vendimeve të institucioneve të Kosovës të vazhdohet represioni i përhershëm ndaj qytetarëve serbë në Kosovë e Metohi dhe konfiskim të pronës shoqërore dhe private të popullit serb”, ka deklaruar Simiq.
Në këtë deklaratë, ai ka thënë se që nga viti 1999 janë uzurpuar mbi 1 milion parcela kadastrale të ndërmarrjeve shoqërore e publike në Kosovë dhe sipas tij ky është një tentim i qartë i Prishtinës zyrtare që përmes vendimeve të njëanshme të përvetësojë pronën joligjore.
“Ne dëshirojmë që të mbrojmë interesin tonë nacional ekonomik, që është shumë i rëndësishëm për shtetin tonë, Serbinë, e po ashtu edhe për popullin tonë në Kosovë e Metohi”, është shprehur Simiq.
Sipas tij, për pronën duhet të bisedohet në Bruksel, madje si temë kyçe. /tesheshi.com/
