Shtetet e Bashkuara po finalizojnë planet për të dërguar sistemin e sofistikuar të mbrojtjes ajrore Patriot në Ukrainë pas një apeli urgjent të Kievit për armë më të forta për të rrëzuar raketat dhe dronët rusë që po shkatërrojnë sistemin energjetik dhe po lënë miliona pa ngrohje përpara një dimër i ashpër, raportojnë agjencitë.
Uashingtoni zyrtar mund të shpallë një vendim për dërgimin eventual të Patriotëve që të enjten, raportojnë agjencitë AP dhe Reuters, duke cituar zyrtarë të qeverisë amerikane.
Një zgjidhje për sfida të shumta
Sistemet e mbrojtjes ajrore të Ukrainës u “testuan” gjithashtu të mërkurën në mëngjes kur kryebashkiaku i Kievit, Vitali Klitschko njoftoi se shërbimet e reagimit emergjent ishin dërguar në distriktin Shevchenkivsky pas shpërthimeve.
Presidenti ukrainas Volodymyr Zelensky i bëri thirrje Perëndimit të hënën që të dërgojë armë më të avancuara në vendin e tij. Agjencitë theksojnë se Patriot do të ishte sistemi më i avancuar i raketave tokë-ajër që Perëndimi u ka dërguar ukrainasve.
Marrja e këtij sistemi do të ishte “shumë, shumë domethënëse” për Kievin, tha Alexander Vindman, një nënkolonel në pension i ushtrisë dhe ish-këshilltar i politikës ukrainase në Shtëpinë e Bardhë.
“Ata (sistemet) do të jenë shumë të afta për të zgjidhur shumë sfida të ndryshme me të cilat përballen ukrainasit, veçanërisht nëse rusët fillojnë të përdorin raketa balistike me rreze të shkurtër veprimi,” vuri në dukje ai.
Pentagoni nuk pranoi të komentojë dhe ende nuk ka asnjë deklaratë nga zyrtarët ukrainas.
Trajnim në Gjermani
Deri më tani, SHBA ka dërguar 19.3 miliardë dollarë ndihmë ushtarake në Ukrainë që nga fillimi i pushtimit rus më 24 shkurt.
Një nga zyrtarët amerikanë i tha Reuters se forcat ukrainase me siguri do të trajnohen në Gjermani përpara dorëzimit të Patriotëve dhe Vindman beson se trajnimi mund të zgjasë disa muaj.
Sipas zyrtarëve, amerikanët do të dërgonin një bateri Patriotësh. Bateria është e montuar në një kamion dhe përbëhet nga deri në tetë lëshues, secila prej të cilave mund të mbajë katër raketa. I gjithë sistemi (radar, stacion kontrolli, kompjuterë, agregate…) ka nevojë për 90 ushtarë për të operuar dhe mirëmbajtur. Megjithatë, vetëm tre ushtarë nevojiten për të operuar në terren, sipas Ushtrisë Amerikane. /tesheshi.com/
