Astrit Patozi, ish-deputet i PD-së, tha sot se me platformën e paraqitur për ringritjen e kësaj partie, është shlyer detyrimi karshi anëtarëve demokratë, por edhe më gjerë. Patozi theksoi se PD është një asset kombëtar, që nuk i përket vetëm demokratëve, port ë gjithë shqiptarëve.
I ftuar në studion e Neës 24, ish-deputeti demokrat tha se përballë kemi një mazhorancë që rrezikon të kthehet në një kërcënim social për shkak të numrave të bollshëm që ka.
Në lidhje me platformën, Patozi theksoi se presim që Lulzim Basha të ketë një reagim pozitiv, pasi në të kundërt përgjegjësia do të binte sërisht mbi të.
“Sot e ardhmja e Shqipërisë varet nga dy politikanë që janë mashtrues, Edi Rama dhe Lulzim Basha. Mes tyre ka një dallim, pasi i pari e çoi partinë e tij në pushtet, madje me një mbështetje edhe më të madhe sesa mendohej, ndërsa i dyti e çoi buzë greminës”, tha Patozi.
Referuar humbjes së PD në 25 qershor, Patozi tha se Basha duhej të mbante të njëjtën përgjegjësi sikundër bëri Sali Berisha në 2013-ën. “Por Basha as atëherë dhe as tani nuk mbajti asnjë përgjegjësi, përkundrazi përmes një proçesi farsë u rikonfirmua në krye të PD me shifra që as Jemin Gjana që mbrojti atë rezultat nuk i beson”, tha Patozi.
Në vijim ai nuk ka kursyer as ironizimet për deputetët e rinj të PD-së, të cilët i quajti yje në ngjitje.
“S’më shkon shumë që të kem koment për yjet në ngjitje të listës Basha aq më tepër që këta janë kolegë të zotit Berisha”, tha deputeti i PD-së. /tesheshi.com/
