Në kulmin e vapës, ka patur një tjetër rritje të “temperaturave politike” këtë të shtunë në selinë blu. Astrit Patozi, një ndër figurat kryesore të PD-së, kritik i ashpër i kryetarit Bashës, ka shpallur ambicien për të kandiduar për kreun e partisë. Por ai ka parashtruar disa kushte për ta bërë këtë gjë, ku veçohet dorëheqja e Bashës, si garanci për garë të ndershme.
“Deklaroj se jam i gatshëm të kandidoj për kryetar të PD nëse do ketë garanci për zgjedhje të lira, të ndershme e të pandikuara. Në emër të mijëra demokratëve që më mbështesin kërkoj rregulla të pastra loje, dorëheqje të menjëhershme të kryetarit Basha si përgjegjësi kryesor për humbjen në zgjedhje, largimin e tij nga zyra bashkë me stafin e vetë dhe çlirimin e selisë nga të gjithë kandidatët derisa të mbahen zgjedhjet. Sekretari i përgjithshëm të marrë nën kontroll database-n e anëtarësisë, në mënyrë që anëtarësimet në kundërshtim me statutin të mos kenë mundësi të votojnë. Gjithashtu, kërkohet kohë e mjaftueshme debati, analize e reflektimi, si dhe kohë për të bërë fushatë”, ka thënë Patozi.
“Në rast se kërkesat tona nuk do të plotësohen ai do të marrë përgjegjësinë për hedhjen në erë të Partisë Demokratike. Në kushte të tilla të gjithë demokratëve u lejohet të mos pranojnë farsën e zgjedhjeve për kryetar”, ka theksuar më tek Patozi, duke i lëshuar një apel Bashës:
“Ndaj ftoj Lulzim Bashën të dalë mbi ambicjet personale dhe të veprojë në të mirë të interesave të PD”.
Është interesant fakti se në këtë rast, Bashës i kërkohet të veprojë sikurse ky i fundit ia kërkonte Ramës gjatë tre muajve të çadrës. /tesheshi.com/
