Në të parën konferencë për shtyp pas themelimit të Bindjes Demokratike, Astrit Patozi, një kryetar ende i pazyrtarizuar i saj me rol kryekordinatori, tha se do ketë përballje për çdo bashki me Edi Ramën, përveç atje ku e djathta ka kandidatë të pavarur.
“Betejë frontale duke u përballur me të gjithë kandidatët e mazhorancës. Në çdo bashki do të kemi kandidatë. Nuk do të nxjerrim kandidatë në bashkitë kur janë regjistruar të pavarur, por do i mbështesim për të mos përçarë votat. Nuk do rivalizojmë dhe do mbështesim kandidatë të mundshëm të djathtë. Askush prej tyre nuk do t’i ketë detyrim Bindjes. Do mbështesim kandidatët e pavarur të bashkive të djathta, sepse bashkimi i forcave opozitare do të rrëzonte Ramën. Ne, kundërshtar të vetëm kemi Edi Ramën”, tha Patozi.
Kjo fjali e fundit e tij shkon drejt përfoljeve të rënda nga kampi i PD-së, ku ai dhe Bindja konsiderohen si “të Ramës”. /tesheshi.com/
