Kina ka kaluar zyrtarisht Shtetet e Bashkuara dhe është bërë kombi më i pasur në botë, ka treguar një raport i ri, shkruan portali NextShark.
Vlera totale neto e botës u rrit nga 156 trilionë dollarë në vitin 2000, në 514 trilionë dollarë në vitin 2020, duke e bërë botën më të pasur se sa ka qenë ndonjëherë në çdo moment të historisë.
Kina mbulon gati një të tretën e kësaj rritjeje, sipas një raporti nga firma konsulente McKinsey & Company.
McKinsey analizoi bilancet kombëtare të 10 vendeve që përfaqësojnë 60 për qind të të ardhurave botërore. Nga këto vende, Kina pati një rritje prej 50 përqind në vlerën neto, e ndjekur nga Shtetet e Bashkuara (22 përqind) dhe Japonia (11 përqind).
Raporti tregoi se pasuria e Kinës u rrit nga 7 trilion dollarë në 2000 në 120 trilion dollarë në 2020. Pasuria e SHBA-së u dyfishua në 90 trilionë dollarë gjatë së njëjtës periudhë.
Por edhe pse bota sot është më e pasur se kurrë, pabarazitë ende ekzistojnë. Vetëm në Kinë dhe Shtetet e Bashkuara, më shumë se 67 për qind e pasurisë kontrollohet nga 10 për qind e familjeve më të pasura – dhe ato vazhdojnë të fitojnë gjithnjë e më shumë.
Raporti tregoi gjithashtu se 68 për qind e vlerës neto të botës qëndron në pasuri të paluajtshme. Pjesa tjetër është në infrastrukturë, inventarë, makineri dhe pajisje, dhe “asete të paprekshme” si pronësia intelektuale dhe patentat.
Me rritjen e kostove të pasurive të paluajtshme, Kina, me firmën e zhvillimit të pasurive të paluajtshme me bazë në Shenzhen, Evergrande, mund të pësojë një krizë financiare të ngjashme me flluskën e banesave që shpërtheu në Amerikë në 2008.
Evergrande është tashmë në një situatë shumë të vështirë për shkak të borxheve në shumën totale prej 300 miliardë dollarësh, të cilat dyshohet se e kanë detyruar presidentin e saj të shesë pronën e tij personale, sipas CNN.
Rënia e çmimeve globale të pronave mund të shkatërrojë deri në 33 për qind të pasurisë botërore, theksoi McKinsey.
Për të shmangur një skenar të tillë, është e nevojshme të inkurajohen investime produktive dhe të qëndrueshme që kontribuojnë në produktin e brendshëm bruto global (GDP), tregoi raporti. /tesheshi.com/
