Partia Demokratike kërkon që deputeti i PS-së, Alfred Peza të hetohet për pasurinë e tij.
“Në të vërtetë, skandali i pasurisë 1 miliardë e 100 milionë lekë të deputetit Alfred Peza, tregon pellgun e madh të korrupsionit të kësaj maxhorance. Miliardat e Pezës janë vetëm pjesa e dukshme e miliardave që kanë përfituar deputetë, ministra e njerëz të afërt me Edi Ramën, qysh ditën e parë që erdhën në pushtet. Kur Alfred Peza ka arritur në pak vite të shumëfishojë pasurinë e tij, përfytyroni sa miliarda ka bërë Ilir Beqaj, Damian Gjinknuri, Saimir Tahiri, Arben Ahmetaj, Erjon Veliaj, e më tej, Edi Rama vetë”, tha gjatë një konference për shtyp zëdhënësja Ina Zhupa.
“Peza nuk ka firmosur vetë tendera e koncesione dhe ka bërë 1 miliardë e 100 milionë. Po Beqaj i koncesioneve, po Tahiri i mijëra parcelave me drogë, po Ahmetaj i çarterave, tatimeve e doganave, po Gjiknuri i energjisë e aferës CEZ, po Veliaj i pallateve e industrisë së mbetjeve. Po Edi Rama, tek i cili dorëzohet haraçi më i madh? Miliardi i Pezës meriton hetim të shpejtë e serioz, por, përveç kësaj, është dëshmia më e pastër se sa dhjetra miliardë kanë vjedhur Edi Rama e të tijtë në këto 3 vite e gjysmë. Ndërkohë që ata bëjnë miliardat, populli zhytet në varfërinë më të skajshme dhe njerëzit braktisin vendin çdo ditë. Këta hajdutë duhen ndalur. Shqiptarët meritojnë një qeveri për shqiptarët, një qeveri për njerëzit, që ta kontrollojnë e ta kenë në dorën e tyre”, shtoi më tej zëdhënësja e selisë blu.
Alfred Peza është vënë në qendër të një debati ditët e fundit, i përfolur për pasurinë e tij, pasi e shoqja ka kërkuar blerje aksionesh në Credins Bank në vlerën e një 1 miliard lekëve.
Ai njihet si ish-drejtues mediash për mbi 15 vite, duke u paguar në kuota shumë të larta, derisa e la gazetarinë për politikën duke kandiduar për PS-në në zgjedhjet e vitit 2013.
Dhe tashmë, emri i tij, që në fakt kurrë nuk është përfolur për afera, është kthyer në shënjestër të një pjese të opinionit, e padyshim opozitës. /tesheshi.com/
