Kryetari i Komunës së Mitrovicës, Agim Bahtiri, nuk e ka parë të arsyeshme të heqë këpucët e tij kur ka hyrë brenda familjes gjashtë anëtarëshe të Murat Fejzullahut, me rastin e dorëzimit të çelësave të banesës së re, të cilën ia ka dhuruar Shoqata “Jetimët e Ballkanit”, nga Prizreni.
Në njoftimin e dërguar nga Komuna e Mitrovicës, ku janë dërguar dhe foto, në njërën prej tyre shihet se si Bahtiri për dallim nga zyrtarët tjerë është i vetmi që mban mbathur këpucët.
“Deri sot kjo familje jetonte në kushte tejet të rënda në një hapësirë prej 20 metrash katrorë, në një barakë të ish ndërmarrjeve të paraluftës nga Serbia. Çelësat e banesës që gjendet në qendër të qytetit, mu para ndërtesës komunale, familjes Fejzullahut, ia kanë dorëzuar të shtunën kryetari i Shoqatës së lartpërmendur, Halil Kastrati dhe kryetari i komunës së Mitrovicës, Agim Bahtiri, ndërkohë që ishte i pranishëm edhe drejtori i Drejtorisë për Mirëqenie Sociale dhe Integrime Evropiane, Qazim Nimani”, thuhet në njoftim.
Bahtiri citohet të ketë thënë se është i lumtur me këtë dhuratë të Shoqatës për këtë familje.
Kujtojmë se Agim Bahtiri është milioner, njëri prej personave më të pasur në Kosovë. Në deklarimin e pasurisë së tij në Agjencinë Kundër Korrupsionit, gjë që ia obligon ligji, Bahtiri ka deklaruar se posedon 4 shtëpi. Prej tyre, njëra ka vlerën prej 860 mijë euro, tjera 200 mijë euro dhe dy të tjera me vlerë prej 150 mijë euro secila.
Ai ka deklaruar edhe tokë bujqësore, 17 hektarë vlera e secilës llogaritët të jetë 6.2 milionë euro. Posedon edhe një Audi Q7 me vlerë 10 mijë euro. Para të gatshme ka deklaruar 5 mijë e 515 euro, ndërsa paga e tij vjetore nga Kuvendi Komunal është 15,753.36 euro. Bahtiri ka deklaruar pagë të dy fëmijëve të tij në Holandë prej 336 mijë euro. /tesheshi.com/
