Ka mbërritur në Tiranë amabasadori i ri gjerman, njeriu që do pasojë Susanne Schutz, një grua me diplomaci aktive, e cila u shndërrua në një prej avokateve kryesore të Reformës në Drejtësi.
Ai është Peter Zingraf, cili, si akt të parë protokollar, paraqitimi letrat kredenciale te presidenti Meta. Ky i fundit, kritik i asaj që Berlini po e mbështet pa rezervë, ashtu siç Uashingtoni, pra Reformën në Drejtësi, vlerësoi si “të shkëlyera” raportet mes dy vendeve.
“Shqipëria do vijojë të mbështetet me besim dhe bashkëpunim gjithnjë e më të ngushtë tek Gjermania mike dhe partnere strategjike. Ne mirëpresim angazhimin e sinqertë dhe vendimtar të Bundestagut për të ndihmuar Shqipërinë në rrugën drejt çeljes së negociatave të anëtarësimit me Bashkimin Europian dhe për përparimin e vendit tonë drejt standardeve demokratike europiane”, tha Meta
Sipas një përshkrimi nga TCH, ambasadori i ri gjerman ka studiuar romanistikë (histori letërsie frënge dhe italiane) në Aachen, Poitiers-Francë dhe Firence-Itali. Ai ka punuar si bashkëpunëtor shkencor në universitetet e Aachen dhe Freiburg im Breisgau, për të kaluar më pas në karrierë diplomatike.
Atë e ka nisur në vitin 1993 kur është bërë pjesë e Shërbimit të Jashtëm, për të vijuar më pas me detyra të ndryshme. Detyrën si ambasador e ka mbajtur më parë në Tanzani, në vitin 2002, si dhe në Dublin, në vitin 2010. /tesheshi.com/
