Shqipëria përfshihet në grupin e vendeve me rrezik të lartë përsa i takon pastrimit ta parave. Kjo të paktën sipas përllogaritjeve dhe studimeve të Institutit të Bazelit për Qeverisje, i cili ka publikuar Basel AML Index (Indeksin Kundër-Pastrimit të Parave), ku merren në analizë 146 vende.
Indeksi mat rrezikun e pastrimit të parave dhe financimeve terroriste, bazuar në të dhëna publike. Vlerësimi bëhet me pikë ku 0 janë vendet me rrezik të ulët, ndërsa me 10 ato që kanë risk të lartë.
Konkretisht Shqipëria renditet në vendin e 85 me një pikëzim prej 5.75, duke shënuar përkeqësim në raport me vitin e kaluar, kur i njëjti indeks ishte përmirësuar në 5.04, pas nivelit prej 5.56 në vitin 2015, shkruan Monitor.
Shifrat tregojnë se kemi një përkeqësim në pikëzimin e indeksit, por ndërkohe një përmirësim në renditje. Në vitin 2016 sipas të njëjtit dokument renditeshim në vendin e 102.
Pra në një vit jemi ngjitur me 17 vende, por sikurse tregojnë shifrat kjo nuk është meritë e përmirësimit tone, por e përkeqësimit të vendeve të tjera të marra në studim.
Në tabelat e raportit, Shqipëria renditet mes 15 vendeve me rrezik më të lartë në Europë dhe Azinë Qendrore, së bashku me Bosnjen dhe Serbinë. Pas nesh renditet edhe Italia.
Më keq mes 146 vendeve në botë sipas Indeksit Kundër Pastrimit të Parave të Bazelit renditet Irani ashtu sikurse ishte dhe në vitin 2016 me një indeks 8.60 për këtë vit. Kurse më mirë renditet Finlanda e cila ka mbajtur edhe ajo të njëjtin pozicion të 2016 por duke përmirësuar indeksin nga 3.05 në 3.04 për këtë vit.
Por çfarë është indeksi AML i Bazelit?
Ky indeks mat riskun e pastrimit të parave dhe financimit të terrorizimit të vendeve bazuar në burimet publike të disponueshme. Një total prej 14 indikatorësh që lidhet me rregulloret kundër pastrimit të parave dhe luftën kundër terrorizmit, korrupsionin standardet financiare, ndikimin politik dhe zbatimin e ligjit agregohen në një vlerësim total risku.
Ashtu siç thuhet edhe në raport synimi i Institutit të Bazelit për Qeverisje nuk është që të verë vendet në krahasim me njëra tjetrën për nivelin e riskut që ka secila për pastrimin e parave por që të shërbejë si një indikator referimi individualisht për çdo vend për të parë ku ka ecur dhe për të orientuar politikat drejt përmirësimet të këtij treguesi me vetveten. /tesheshi.com/
