Pas shpërthimit të Panama Papers, Drejtoria e Pastrimit të Parave pritet të nisë një mision special në Shtetet e Bashkuara të Amerikës, përkatësisht në sektorin e FBI-së që merret me luftën ndaj falsifikimit të parave dhe riciklimin.
Burime të tesheshi.com, theksuan se edhe pse kreu i këtij institucioni, Gent Gazheli, është thuajse i lëvizur, pasi është emëruar ambasador i Shqipërisë në Turqi, gjithsesi, ai dhe ministrja e Ekonomisë, Milva Ekonomi, kanë bërë gati një plan për të marrë info në FBI për pjesën që mbulon Panamanë, pikërisht mbi kompanitë e dyshuara që kanë marrë kontrata shtetërore, por që paratë i kanë investuar në zona financiare off-shore, që do të thotë jashtë mbulimit fiskal të Shqipërisë.
Ndërkaq, një komision auditues i qeverisë po analizon të gjitha problemet dhe ankesat që kanë ardhur për kompanitë që kanë marrë konçesionet e rëndësishme të shtetit shqiptar, që nga Porti i Durrësit, Dogana, Tatime etj., dhe po i shqyrton nëse ka pasur regjistrime apo investime në të ashtuquajturat parajsa fiskale.
Ndërkohë, burimi ynë theksoi se një material voluminoz që mbahej në zyrën antikorrupsion në Kryeministri, pritet të shkojë këto ditë në Prokurorinë e Përgjithshme si denoncim i qeverisë shqiptare për disa praktika pune në financat shqiptare, që i kanë lënë buxhetit një barrë të tillë konçensionesh, të cilat kanë jo vetëm problem, por që edhe nuk po shqiten pasi kërcënojnë me arbitrazhe që arijnë qindra milionë euro.
Përmbajtja e dosjes mbahet sekret, por siç mësohet, brenda është denoncimi për një nga drejtuesit e financave shqiptare që sot është aktiv në politikë. Kjo do të jetë vetëm dosja e parë që pritet të shqyrtohet pas kthimit të zyrtarit të pastrimit të parave në FBI.
Një fakt shqetësues për rastin Panama Papers, është edhe e dhëna më e re që vjen nga raporti i Bankës së Shqipërisë.
Sipas këtij raporti, vetëm gjatë vitit 2015-të, nga Shqipëria dolën 238 milionë euro fitim prej kompanive të ndryshme që punojnë këtu por dividentin, pra fitimin neto, e invstojnë në shtete të tjera.
Dhe është fakt se kompanitë e huaja vijojnë të sigurojnë fitime të kënaqshme në tregun shqiptar duke mos e njohur krizën.
Sipas të dhënave të Bankës së Shqipërisë, gjatë vitit të kaluar transfertat e fitimeve të këtyre kompanive drejt vendeve të origjinës janë shtuar me 11 për qind; çka do të thotë që Shqipëria po përjeton një proces thuajse kolonial, siç ndodhte në fillim të shekullit të XX-të, ku disa korporata të mëdha shumëkombëshe i merrnin pasuritë vendeve të tjera duke mos lënë asgjë në shtetin ku i nxirrnin ato nga nëntoka.
Sipas përllogarive që janë bërë në vite, vetëm kompanitë e mëdha të telefonisë mobile që kanë qenë të dyja greke, dërgonin në vendin e origjinës nga 400 milionë euro fitime në vit; që po ta shumëzosh me 16 vjet kur nisën veprimtarinë, shifra bëhet maramendëse; përkatësisht 6 miliardë e 400 milionë euro, gati sa dy vite buxheti i Shtetit shqiptar. Përgatiti: Ylli Pata – /tesheshi.com/
