Duke filluar nga nesër (20 shtator) do të nisë puna në terren për evidentimin e objekteve që janë ndërtuar anës rrugëve dhe që nuk kanë respektuar distancat që parashikon ligji nga akset nacionale. Një ditë më parë ministri i Infrastrukturës dhe Energjisë, Damian Gjiknuri, deklaroi se do të vijojë operacioni për pastrimin e akseve rrugore kombëtare nga objektet e paligjshme.
Tashmë grupet e punës do të evidentojnë në terren këto objekte, pronarët e të cilëve do të kenë vetëm dy javë në dispozicion për të bërë çmontimin, pasi në të kundërt do të ndërhyjnë fadromat.
Drejtori i Mirëmbajtjes së Rrugëve, pranë ARRSH-së, Spartak Tarka, tha se largimi i këtyre objekteve synon të rritë sigurinë në rrugë dhe të shmangë aksidentet.
“Pastrimi i akseve rrugore është i nevojshëm me qëllim që të shmangen aksidentet. Në rrugë duhet të ketë vetëm tabela dhe sinjalistika. Nuk do ketë tabela reklamë pa lejen e ARRSH. Synohet që të arrihen standardet europiane në këtë drejtim”, tha ai në një intervistë televizive.
Qëllimi i vetëm i këtij aksioni, sipas tarkas, është të shpëtohet jetë, të shmangen pasojat e aksidenteve.
“Për realizimin e këtij aksioni, janë ngritur grupe pune për të bërë verifikimin e terrenit, sidomos në vijën e parë. Distancat e reklamave do të jenë sipas standardeve të rrugës, do të zbatohet largësia që duhet të kenë. Nuk do të lejohet që të vendosen objekte që nuk janë në funksion të rrugës”, u shpreh Tarka. /tesheshi.com/
