Fjala para Kongresit e kryeministrit izraelit Benjamin Netanyahu, e përqendruar kryesisht në programin bërthamor të Iranit, është pritur me kritika nga presidenti amerikan, Obama, si dhe nga zyrtarët iranianë.
“Çka mund të them unë është se nuk kishte asgjë të re”, tha presidenti amerikan për fjalën e Netanyahu-t në Kongres.
“Kryeministri nuk ofroi ndonjë alternativë frytdhënëse për çështjen kryesore, që është mënyra si e ndalojmë ne Iranin nga sigurimi i një arme bërthamore, që do ta bënte atë shumë më të rrezikshëm dhe do t’i jepte liri për veprim edhe më të madh në rajon,” shtoi Obama.
Administrata e Obama-s ka mëtuar ta zgjidhë përmes negociatave diplomatike çështjen bërthamore të Iranit. Por kryeministri izraelit ka qenë kritik ndaj këtij qëndrimi.
“Kjo është një marrëveshje e keqe. Eshtë një marrëveshje shumë e keqe. Më mirë pa të,” u shpreh Netanyahu gjatë fjalës së tij, me të cilën iu drejtua dy dhomave të Kongresit, në lidhje me marrëveshjen e diskutuar në negociatat diplomatike.
Qeveria iraniane iu përgjigj gjithashtu fjalimit, duke thënë se ishte “i përsëritur dhe i mërzitshëm”.
Obama qe kundër pjesëmarrjes në mbledhjen e Kongresit, me pretendimin se nuk ishte një vendim i drejtë dy javë përpara zgjedhjeve izraelite, të planifikuara për më 17 mars. Dhe shumë anëtarë demokratë të Kongresit po ashtu nuk e miratuan vendimin e Netanyahu-t dhe nuk e ndoqën fjalimin në sallë.
Marrëdhëniet e tensionuara mes kryeministrit izraelit dhe presidentit amerikan kanë gjetur shprehje dhe në anketimet e fundit në Amerikë, e gjithashtu në rivalitetin dhe në ndarjen gjithnjë e më të madhe midis anëtarëve republikanë e demokratë të Kongresit. /tesheshi.com/
