Dënimi për sulmin terrorist që ndodhi orë më parë në aeroportin Ataturk të Stambollit e që la dhjetëra të vdekur e të plagosur ka ardhur nga vende nga e tërë bota. Udhëheqës e figura të ndryshme botërore kanë shprehur keqardhjen për viktimat, duke e dënuar ashpër në të njëjtën kohë aktin terrorist.
“Shtetet e Bashkuara e dënojnë me termat më të fortë të mundshëm aktin e urryer terrorist të sotëm në aeroportin ndërkombëtar Ataturk të Stambollit, në Turqi, që duket se ka vrarë dhe ka plagosur duzina,” thotë një deklaratë e sekretarit të shtypit të Shtëpisë së Bardhë, Josh Earnest.
“Aeroporti ndërkombëtar Ataturk, ashtu si aeroporti i Brukselit, i cili u sulmua më herët këtë vit, është simbol i lidhjeve dhe marrëdhënieve ndërkombëtare që na bëjnë bashkë. Ngushëllimet tona më të thella shkojnë për familjet dhe të dashurit e atyre që u vranë, dhe ne dëshirojmë një shërim të shpejtë të të plagosurve,” vazhdon deklarata e tij.
“Ne qëndrojmë të palëkundur në mbështetjen tonë për Turqinë, për partnerin dhe aleatin tonë të NATO-s, bashkë me të gjithë miqtë dhe aleatët anembanë botës,ndërsa vazhdojmë të përballemi me kërcënimin e terrorizmit.”
Hillary Clinton ka reaguar gjithashtu, duke thënë, “Terroristët kanë goditur përsëri në zemër të një prej aleatëve tanë të NATO-s, dhe të gjithë amerikanët qëndrojnë të bashkuar me popullin turk kundër kësaj fushate urrejtjeje dhe dhune.”
Nuk ka munguar dhe një reagim nga Donald Trump, “Lutjet tona janë për familjet e të vrarëve dhe të plagosurve në Stamboll. E tërë bota është e tronditur dhe e tmerruar. Kërcënimi terrorist nuk ka qenë kurrë më i madh. Armiqtë tanë janë brutalë dhe të pamëshirshëm, e do të bëjnë gjithçka për t’i vrarë ata që nuk i nënshtrohen vullnetit të tyre.”
“Jemi të brengosur për viktimat. Ne qëndrojmë në krah të Turqisë,” është shprehur ministri i Jashtëm gjerman, Frank-Walter Steinmeier.
“Sulm terrorist i urryer. Qëndrojmë bashkë me popullin e Turqisë,” shkruan kryeministri belg, Charles Michel.
Në të njëjtën frymë shkruan dhe presidentja e Lituanisë, Dalia Grybauskaite, “Ne i dënojmë këto akte mizore dhune.” /tesheshi.com/
