Mbi 50 është numri i personave të lënduar nga tërmeti i pasdites të kësaj të shtune. Ka qenë vetë ministrja e Shëndetësisë Ogerta Manastirliu ajo e cila ka raportuar për numrin dhe ka folur mbi gjendjen e tyre.
“Pashë nga afër gjendjen e të lënduarve nga tërmeti. Nga momenti i mbërritjes, tani janë 52 qytetarë që kanë marrë shërbim dhe janë larguar. Të gjithë po marrin ekzaminimet e nevojshme. Situata e tyre paraqitet e qetë. Një rast paraqitet më rëndë. Por në përgjithësi situata është e qetë.
Në spital ka staf shtesë për të përballuar çdo fluks. Vijojnë qytetarët të vijnë të marrin shërbime. Qendra e urgjencës Kombëtare është duke punuar intensivisht. Po marrim qytetarët që kanë problematika. Janë situata që shoqërohen nga gjendje paniku. Urgjenca ka ndërhyrë edhe në shtëpi personat që kanë qenë në gjendje të rëndë.
Vlerësimet do bëhen hap pas hapi. Nuk do mungojë asnjë element i kujdesit. Raste të tilla, kërkojnë gatishmëri dhe një plan emergjence, që nga vendosja e pacientëve në katet e para.
Në Durrës 16 qytetarë kanë marrë shërbim shëndetësor në spital”, tha Manastirliu. /tesheshi.com/
