Ka ardhur reagimi zyrtar i Bashkimit Evropian, përmes Përfaqësueses së Lartë Federica Mogherini, e cila deklaron angazhimin e menjëhershëm të BE-së për të ofruar asistencë pas tërmetit vdekjeprurës në Shqipëri.
“Pas tërmetit shkatërrues që ka goditur Shqipërinë këtë mëngjes, ne i shprehim ngushëllimet tona popullit dhe autoriteteve të vendit. Bashkimi Evropian solidarizohet me Shqipërinë dhe është i gatshëm të ofrojë asistencë, edhe me Mekanizmin e Mbrojtjes Civile Europiane.
Qendra e Koordinimit të Emergjencave është në kontakt të vazhdueshëm me Emergjencat Civile shqiptare. Jemi në kontakt me qeverinë shqiptare për të përcaktuar mënyrat më të mira për të vepruar”, thuhet në deklaratën e BE-së.
Një reagim ka ardhur dhe nga Ambasada e SHBA-së, e cila shpreh gatishmërinë për të ndihmuar Shqipërinë për të kaluar këtë situatë të rëndë.
“Shtetet e Bashkuara shprehin ngushëllimet më të thella për të gjitha familjet dhe komunitetet e prekura nga tërmeti. Shtetet e Bashkuara janë pranë miqve tanë në Shqipëri, ashtu si amerikanët dhe shqiptarët kanë qëndruar gjithnjë pranë njëri-tjetrit në kohë të vështira. Ne vijojmë të ndjekim situatën nga afër dhe jemi në gatishmëri për të ofruar mbështetjen tonë”, thuhet në një deklaratë solidarizuese.
Ndër të tjera, kryeministri Rama ka konfirmuar një bisedë me presidentin Vuccicc, duke bërë që ky i fundit të nisë drejt Shqipërisë një skuadër të specializuar emergjencash. /tesheshi.com/
