Gjysma e rezervave të arit dhe valutës së Bankës së Rusisë janë ngrirë për shkak të sanksioneve perëndimore, tha ministri rus i financave Anton Siluanov në një intervistë për kanalin televiziv Rusia 1, në të cilën ai tha se po llogariste në ndihmën e Kinës për t’i bërë ballë goditjes ekonomike.
“Ne kemi një sasi totale të rezervave prej rreth 640 miliardë dollarë. Për momentin, ne nuk mund të përdorim rreth 300 miliardë dollarë nga ato rezerva,” tha Siluanov, siç raporton agjencia ruse e lajmeve TASS. Një pjesë e rezervave valutore të Rusisë është në monedhën kineze, por vendet perëndimore tani po ushtrojnë presion mbi Kinën në drejtim të kufizimit të bashkëpunimit tregtar.
“Sigurisht, ka presion për të kufizuar aksesin në ato rezerva që kemi në juan. Mendoj se partneriteti ynë me Kinën do të na lejojë të ruajmë bashkëpunimin që kemi arritur dhe jo vetëm ta ruajmë atë, por edhe ta përmirësojmë atë në një mjedis ku tregjet perëndimore janë duke u mbyllur,” tha Siluanov.
Meqenëse vendet perëndimore vendosën sanksione të paprecedentë ndaj sistemit korporativ dhe financiar të Rusisë, analistët thonë se paraqitja e fundit televizive e Siluanov është deklarata më e qartë e Moskës deri më tani se ajo do të kërkojë ndihmë nga Kina, me të cilën ka rritur ndjeshëm bashkëpunimin kohët e fundit.
Ngrirja e gjysmës së rezervave valutore të Rusisë është një nga masat më të dhimbshme për ekonominë dhe pasojat u panë shumë shpejt përmes humbjes së gjysmës së vlerës së rublës, rritjes së përshpejtuar të çmimeve, mungesave dhe kufizimeve në eksportet e shumë produkteve. Falë rezervave të larta valutore, u vlerësua se Rusia do të mund t’i rezistonte sanksioneve për një kohë të gjatë.
Një muaj më parë, vetë Siluanov tha se Rusia do të ishte në gjendje t’i rezistonte sanksioneve falë rezervave të bollshme dhe se ai po mendonte madje t’u ofronte eurobono investitorëve të huaj pasi paqëndrueshmëria e tregut u qetësua.
Ndaj ministri i financave tani thotë se Rusia do të përmbushë detyrimet e saj për të shlyer borxhin shtetëror, por do t’u paguajë rubla debitorëve derisa të shkrihen rezervat e saj shtetërore. “Ne do të paguajmë borxhet që duhet t’u paguajmë kreditorëve nga vendet që janë armiqësore ndaj Federatës Ruse dhe që kanë vendosur kufizime të tilla në përdorimin e rezervave valutore në ekuivalentin e rublave,” tha ai.
Sipas dekretit presidencial, i cili tashmë është paralajmëruar nga agjencitë e vlerësimit të kredisë, Rusia ka mundësuar denominimin e pagesës së borxhit të shtetit në valutë në rubla vendase.
Ditët e fundit, agjencitë kanë ulur vlerësimin e besueshmërisë së vendit në një klasë spekulative, duke pritur që ai të falimentojë në mesin e prillit, kur detyrimet e huaja mbarojnë. /tesheshi.com/
