Autoritetet e Shëndetësisë në Maqedoni njoftuan se nuk ka shenja epidemie në rajonin e Tetovës pas përmbytjeve që përfshinë këtë zonë dhe shkaktuan dëmtime të mëdha. Të dhënat flasin se nuk ka rritje të kërkesave për ndihmë mjekësore në qendrat publike shëndetësore.
Analizat e ujit të pijshëm po kryhen në të gjitha zonat e përfshira nga përmbytjet dhe rezulton se uji është në parametra të rregulltë.
Autoritetet njoftuan edhe për dezinfektimin e një hapësire prej 25 mijë metrash katrorë, ndërsa edhe në zona të tjera vijon ky proces për të mbajtur në kontroll parametrat në sistemin e ujësjellësave.
Pas vërshimeve në Tetovë, pati shqetësim për ndonjë epidemic të mundshme, për shkak të dëmtimeve të rënda që pësuan ujësjellësit, mungesës së ujit dhe temperaturave të verës që përkeqësuan situatën me mbetjet e përmbytjeve. /tesheshi.com/
