Ka qenë dy muaj më parë kur tesheshi.com paralajmëronte se Ilir Meta do të tërheqë Edmond Haxhinaston dhe Edmond Panaritin për të provokuar një krizë qeveritare.
Kështuqë largimi i sotëm zyrtar i ministrit të Transporteve nuk është fare suprizë, vetëm se risi është deklamimi “zyrtarisht”.
Dy ditë më pare, në portale përgjithësisht me qëndrime kundër Edi Ramës dhe që janë shfaqur afër LSI-së, është përhapur lajmi se largohet ministri i Brendshëm Saimir Tahiri, i cili kalon në postin e Ministrit të Drejtësisë, ndërsa Luan Rama i LSI-së rikthehet në këtë dikaster pas largimit që i bëri Ilir Babaramo si pasojë e shpullës që mori nga ish-kryeredaktori i ZP-së me post ministri, pra vetë Luan Rama.
Por në një njoftim të zyrës së shtypit të Kryeministrit të shpërndarë në këto momente, theksohet se “nuk do të ketë asnjë ndryshim tjetër në qeveri”.
Kjo në fakt është edhe pasojë e drekës politike te “Piazza” mes dy aleatëve të mazhorancës qeverisëse.
Siç mësohet, në takimin mes Ramës dhe Metës nuk është rënë dakord, por vetëm Meta i ka bërë të ditur se kryesia e LSI-së ka vendosur që ta largojë Edmond Haxhinaston nga posti i ministrit të Transporteve për ta zëvendësuar me këshilltarin e Ilir Metës, Sokol Dervishaj, ish-zv.ministër i Jashtëm.
Edhe pse duket një skemë normale koalicioni, operacioni procedurial i miratimit të shkarkimit të ministrit dhe emërimit të ministrit të ri nuk do të jetë kaq i thjeshtë.
Pengesa e parë është presidenti Bujar Nishani, i cili në rastin e largimit të Nasip Naços bëri rezistencë ka replikoi ashpër me Ramën për vonesën e dekretimit të ministrit të ri Ylli Manjani.
Ndërkaq, beteja më e fortë do të jetë votimi i dekreteve të Presidentit në Kuvend, ku pritet që deputetë të LSI-së t’i kërkojnë Edi Ramës ribërjen e kabinetit pasi ndryshe nuk do të votojnë dekretet e Presidentit.
Në këtë lojë pritet të futet edhe Shpëtim Idrizi, i cili pas premtimit të Edi Ramës si aleat potencial, pret të marrë një dikaster.
Media pranë LSI-së kanë folur që Idrizi mund të marrë dikasterin e Damian Gjiknurin, pra Energjitikën, por burime të sigurta në mazhorancë i thanë tesheshi.com se “nuk bëhet fjalë, Ministria e Brendshme dhe Energjitika nuk dorëzohen në asnjë mënyrë nga ana e PS-së”.
Ndërkaq, Edi Rama, nuk ka folur shumë gjatë drekës me Ilir Metën, por ka deklaruar se “pret nga LSI-ja që në Dibër të sillet si aleat”.
Nëse do të ketë manovra në Kuvend me rastin e dekreteve për shkarkimin e Haxhinastos dhe emërimit të Dervishajt, pritet që Edi Rama pas zgjedhjeve të 11 shtatorit në Dibër të ribëjë kabinetin vetëm me PDIU-në dhe disa parti të djathta si PDK dhe PAA.
Një deputet i mazhorancës bëri të ditur se në këto momente po zhvillohen takime të ethshme të Ilir Metës nga njëra anë me deputetë të PS-së, dhe Edi Ramës me të LSI-së.
Mazhoranca ka gjasa që të bjerë më 11 shtator. Kjo që ndodhi sot është vetëm paralajmërimi.
Por burimi në kryesinë e PS-së theksoi se “presioni i Metës nuk mund të bëhet aq i fortë pasi ai vetë e di se janë 5 deputetë të LSI-së që nuk i binden tashmë”. /tesheshi.com/
