Ka kaluar qetësisht refuzimi thuajse përfundimtar i presidentit të Republikës, Ilir Meta për të dekretuar Helidon Bendon, propozimin e Kryeministrit për drejtor të Shërbimit Informativ Shtetëror.
Lajmi nuk u dha zyrtarisht, por me burime u përcoll nga disa media që njihen si të afërta me LSI-në, duke nisur nga “Koha Jonë” e Lesit apo “Express”-i i Buzhalës.
Dhe ky qëndrim erdhi fill pas performancës nervoze të kreut aktual të LSI-së, Monika Kryemadhi në Kuvend, e cila ishte protagonistja numër një e barrikadës opozitare kundër largimit të Adriatik Llallës.
Vetë zonja Kryemadhi deklaroi tek Ilva Tare se nuk pajtohej me qëndrimet e presidentit të Republikës, madje shtoi se edhe mund ta shkarkonin, si për të treguar se ka një distancë shumë të madhe qëndrimesh me bashkëshortin e saj.
Por, në realitet, kjo distancë s’duket kaq e madhe, megjithëse kreu i shtetit nuk ka ndërmarrë një barrikadë të dukshme dhe të zhurmshme ndaj Edi Ramës, të cilën e paralajmëroi gjatë fushatës së 25 qershorit, kur nuk kishte marrë detyrën më të rëndësishme të shtetit shqiptar.
Presidenti i votuar nga PS-ja me “pahir”, duket se ka mbajtur një detantë me Edi Ramën pikërisht për një ekuilibrim institucional, por me shpresën se do të kishte në fund një marrwveshje për Adriatik Llallën.
Dhe Meta apo edhe një pjesë e opozitës, nuk duket se s’kanë marrë mesazhe inkurajuese nga ambjente të mazhorancës për një marrëveshje xhentëlmenësh që Adriatik Llalla mund të qëndrojë deri në emërimin e Kryeprokurorit të ri, pas instalimit të Këshillit të Lartë të Prokurorisë.
Por, gjithçka duket se ka marrë rrjedhë ndryshe pas vizitës së Edi Ramës në Bruksel në fillim të këtij muaji, ku u pa qartë se BE, por edhe SHBA do të kërkojë zyrtarisht largimin e Adriatik Llallës.
Çka dhe ndodhi më shumë se një herë!
Madje tre ditë para seancës parlamentare të votimit për Kryeprokurorin e përkohshëm, ambasadori amerikan në Tiranë, Donald Lu, ka takuar posaçërisht për këtë çështje presidentin Meta në zyrën e tij. Por nuk dihet se si ka rrjedhur biseda dhe cili ka qënë qëndrimi i kreut të shtetit.
Zyra e Presidencës nuk shpërndau as një qëndrim të Ilir Metës për Prokurorin e Përkohshëm, e as një qëndrim në lidhje me takimin me ambasadorin amerikan.
Presidenti Meta foli për çështjen e kryprokurorit, gjatë një konference të përbashkët me presidentin e Malit të Zi, por lëshoi një deklaratë evazive.“Kryeprokurori sipas Kushtetutës” tha Meta, i cili nuk përcaktoi se zgjedhja e kryeprokurorit të Përkohshëm është antikushtetuese.
Por duket se situata është ngarkuar, pikërisht pas votimit në Kuvend, kur sekretari i Përgjithshëm i Presidentit, Genc Gjonçaj dhe Kryeprokurorja e Përkohshme, Arta Marku shkuan në zyrat e Prokurorisë së Përgjithshme dhe përzunë Adriatik Llallën pa një pa dy.
Asnjë fjalë nga Presidenca, për të cilën u fol se do të kishte të drejtën e kundërfirmës.
Siç duket, biseda e Donald Lu-së me Metën, pikërisht këtë ka pasur si objekt; mosreagimin e Presidentit për rotacionin në Prokurorinë e Përgjithshme. Rotacion që u bë fakt i kryer në deklaratën e ambasadës amerikanë në Tiranë, vetëm dy orë pas mitingut të opozitës.
Por Meta, tashmë me mosfirmosjen e kreut të SHISH, ka nisur një stinë të re marrëdhëniesh me kryeministrin Edi Rama: stinë që u “inagurua” me mosdekretimin e kreut të SHISH.
Kjo atmosferë paralajmëron një “ngricë” të gjatë institucionale, e cila mund të bllokojë institucionet e reja të drejtësisë. Pra, megjithëse zonja Kryemadhi deklaroi se ka një qëndrim të ndryshëm me bashëshortin e saj, ky i fundit që “rastësisht” është President i Republikës do të ndikohet nga “Zonja e Parë” që refuzoi statusin formalisht.
Çizmja e hedhur nga Kryemadhi drejt Ramës, ishte në një farë mënyrë edhe shenjë për sjelljen e Presidencës. Njësoj si në rastin kur Lulzim Basha i kërkoi Adriatik Llallës të arrestojë Saimir Tahirin dhe kryeprokurori e bëri zyrtarisht këtë kërkesë.
Edhe sikur të mos ketë lidhje të personazheve reale me faktet e ndodhura, lidhjen e bën publiku. Në fund të fundit, faktet flasin vetë… /tesheshi.com/
