Alkooli ka sjellë tragjedi në një familje në Tiranë, ku pabesueshmërisht motra ka vrarë motrën me thikë. Autorja madje është më profesion mësuese.
Ngjarja ka ndodhur në një banesë në Rrugën e Kavajës.
Jetëhumbura është Amanda Pushani, 37 vjeçe, qëlluar nga e motra Marsela Pushani, 40 vjeçe, mësuese.
Autorja ka thënë para uniformave të policisë se nuk ka dashur ta vrasë motrën dhe se ka kryer vrasjen në kushtet e vetëmbrojtjes. Sipas saj, e motra e saj ishte e alkoolizuar prej 10 vitesh dhe për këtë arsye ishte problematike.
Marsela Pushani rrëfen se pak para ngjarjes po debatonin pasi ajo dhe e ëma i kishin kërkuar që të hiqte dorë nga alkooli. Sipas 40-vjeçares viktima ka marrë thikën dhe ka kërcënuar se do ta vrasë atë dhe nënën e saj. Në këto kushte, 40-vjeçarja e ka qëlluar me thikë një herë në bark, duke i marrë edhe jetën.
“Nuk kam dashur ta vras motrën, veprova në kushtet e vetëmbrojtjes. Prej më shumë se 10 vitesh ishte e alkoolizuar dhe problematike. Mëngjesin e djeshëm kemi pasur debat pasi i kërkonim që të linte alkoolin. Fillimisht Amanda mori thikën dhe më kërcënoi mua dhe mamanë se do të na vriste. Situata u tensionua dhe veprova në kushtet e vetëmbrojtjes”, ka thënë Marsela Pushani në Polici. /tesheshi.com/
