“Partia e njerëzve”, motoja që pritet të heq nga listat 1/3 e grupit aktual demokrat me anë të votimit në bazë
26-vjetori i Partisë Demokratike u festua dje, e dielë, 11 dhjetor. Organizimi i festës ishte konceptuar ndryshe nga çdo vit tjetër i mëparshëm…siç duket për t’iu përshtatur plotësisht kursit që ka shpallur tashmë kryetari Basha; partia e njerëzve. Në vend të shkëlqimit të Pallatit të Kongreseve, simpatizantët ishin ftuar në oborrin e selisë blu, ish-shtëpia e oficerëve. Në vend të kostumeve firmato të VIP-ave të Tiranës, që nuk mungojnë në kësij evenimentesh, kishte fytyra të njerëzve të thjeshtë.
Kishte vetëm një njeri në qendër të gjithë kësaj; ai ishte Lulzim Basha. Diku në sfond në vetëm 2 foto dukej dhe statura e Sali Berishës, gjithmonë në funksion të “shkëlqimit” të pasardhësit të tij të ri. Berisha nuk mbajti fjalim në këtë festë duke u mjaftuar me një përsiatje në facebook mbi arritjet e tij si kryeministri i fundit i qeverisjes së PD-së para se të dilte në opozitë.
Asnjë figurë tjetër e njohur, deputetë apo ish-ministra, kryetar bashkish apo themelues të PD-së, nuk shfaqeshen në foto-albumin e publikuar nga Lulzim Basha pas festës.
Një eleminim i të gjithëve dhe zëvendësimi me njerëz të zakonshëm, vajza, djem, gra me fëmijë dhe burra pa kostum. Disa prej themeluesve, ish-ministra në kohën e Berishës, janë distancuar prej kohësh nga protagonizmi në parti, madje duke mos shkuar as në kremtimin e ditëlindjes. Mungonin Arben Imami, Genc Ruli, Eduart Selami. Mungonte për arsye personale edhe Jozefina Topalli, e cila është parë si rivalja kryesore e Bashës në parti, por dhe ata që ishin prezent, u “retushuan” nga fotot e festës.
Ky “eliminim” i kastës së vjetër nuk është zgjedhja e fotografit, por një veprim i qëllimtë, thanë për tesheshi.com burime brenda PD-së.
Strategjia e re e Bashës për zgjedhjet e ardhshme ka të bëjë pikërisht me këtë; eleminimin e të paktën 1/3 së grupit aktual parlamentar dhe futjen në parti të emrave të rinj. Në zonat ku Basha do të vendosë emrat e tij për deputetë do të përdorë “dorën e padukshme të bazës” duke i hedhur në votim 1 anëtar një votë emrat e kandidatëve.
Po si do të realizohet kjo?
Vetë Basha e ka bërë të qartë, por ka kaluar pa vëmendjen e duhur duke qenë se është akoma herët deri në pragun e zgjedhjeve, kur nis përpilimi i listave.
“Çdo kush që ka një vizion apo alternativë do të konkurrojë që vizioni i tij apo i saj të mund të bëhet vizioni i partisë. Vendimet e rëndësishme do t’u besohet anëtarëve, duke lidhur fatin politik dhe karrierën të çdo kujt me anëtarët e PD-së dhe jo vetëm me kryetarin. Jo vetëm kryetari dhe drejtuesit e saj do të zgjidhen me votën e anëtarësisë, por të gjithë drejtuesit për funksionet publike përfshirë kandidatë për kryetar bashkie dhe deputetë do të përzgjidhen sipas parimit një anëtar një votë.Ne do të punojmë që në zgjedhjen e ardhshme për përzgjedhjen e kandidatëve në disa zona elektorale për ta shtrirë më vonë në gjithë vendin. Le ta dinë të gjithë; përfaqësimi politik i Partisë Demokratike vendoset nga anëtarët e partisë. Ne do të krijojmë një strukturë perëndimore të çliruar nga ofiqet”- u shpreh ndër të tjera ai gjatë fjalimit të 26- vjetorit.
Synimi i Bashës duket i qartë; për të ardhur në pushtet sërish duhen paguar disa kosto, të paktën duhet hequr barra që mbartet që prej humbjes së zgjedhjeve në 2013-ën. /tesheshi.com/
