Pasi FIFA ftoi vendet nga Azia dhe Oqeania për të paraqitur ofertat, Arabia Saudite shpalli ofertën e saj për Kupën e Botës 2034.
Federata e Futbollit të Arabisë Saudite ka njoftuar se dëshiron të organizojë një “turne të klasit botëror”, duke shtuar se do të frymëzohet nga “pasioni i rrënjosur për futbollin(!!!)” në atë vend.
“Oferta e parë e Arabisë Saudite për Kupën e Botës mbështetet nga përvoja në rritje e vendit në organizimin e ngjarjeve të futbollit të klasit botëror dhe planet e saj të vazhdueshme për të mirëpritur tifozët në mbarë botën në Kupën e Botës për Klube 2023 dhe Kupën e Azisë 2027,” tha shoqata në një deklaratë.
Njoftimi saudit erdhi menjëherë pasi FIFA zgjodhi Marokun, Spanjën dhe Portugalinë si mikpritëse të Kupës së Botës 2030, duke shtuar se tre ndeshje nga ai Botëror do të luhen në Uruguaj, Argjentinë dhe Paraguaj.
Pasi FIFA njoftoi se Kupa e Botës 2034 do të mbahet në Azi ose Oqeani, presidenti i Konfederatës së Futbollit të Azisë, Salman bin Ebrahim Al Khalifa e përshëndeti vendimin.
“Ne besojmë fuqimisht se kjo hap rrugën për një mundësi më të drejtë për të gjitha konfederatat për të konkurruar dhe pritur Kupën e Botës prestigjioze,” tha ai.
Kohët e fundit, Arabia Saudite ka investuar qindra milionë euro në zhvillimin e infrastrukturës së futbollit dhe transferimeve të lojtarëve.
Vetëm në dritaren e fundit të transferimeve, klubet e Ligës Profesionale Saudite (SPL) shpenzuan më shumë se 950 milionë dollarë për nënshkrime.
Shpenzimet e Arabisë Saudite në afatin kalimtar, i cili u mbyll më 7 shtator, tejkaluan shpenzimet e katër ligave evropiane nga “pesëshja e madhe”, dhe vetëm Premier League është përpara këtij vendi nga Lindja e Mesme.
Erdhën Ronaldo, Neymar, Benzema
Në fillim të këtij viti, Fondi i Investimeve Publike Saudite (PIF) njoftoi një Projekt të Investimeve dhe Privatizimit të Klubeve Sportive që përfshin Al-Ittihad, Al-Ahli, Al-Nassr dhe Al-Hilal, me një numër lojtarësh kryesorë që lëvizin në ligën saudite.
PIF zotëron 75 për qind të secilit prej katër klubeve, ndërsa fondacionet e tyre jofitimprurëse zotërojnë 25 për qind të secilit.
Një numër i futbollistëve më të mirë, si Cristiano Ronaldo, Neymar, Karim Benzema dhe Brozoviç, kanë nënshkruar së fundmi kontrata me para të mëdha me klubet e Ligës Saudite të Pro.
Botërori i ardhshëm, në të cilin do të marrin pjesë 48 kombëtare në vitin 2026, do të mbahet në SHBA, Meksikë dhe Kanada. /tesheshi.com/
