Një faqe në Facebook me emrin Humans of New York ka promovuar një trend të ri i cili ka filluar të përhapet në mbarë botën. Qëllimi është njerëzit të shpërndajnë foto dhe histori të përditshme të tyre për t’i ndarë me të tjerë. Dhe njerëzit e Pakistanit kanë hapur një faqe të ngjashme në Facebook, e cila dokumenton historitë dhe fotot e tyre gjithashtu. Një burrë i moshuar, historia e të cilit është postuar në këtë faqe, ka ndarë një histori shumë personale të jetës me bashkëshorten e tij, e cila pas 27 viteve me të i ka ndërruar jetë. Me këtë rast ai ka përcjellë dhe disa këshilla me rëndësi për të gjithë burrat në mbarë globin.
“Martesa jonë zgjati 27 vjet e 2 muaj saktësisht. Ajo ishte e sëmurë. Gjinekologu po bënte çmos për t’i shpëtuar jetën. Por kishte ardhur momenti për të ikur nga kjo botë. Unë nuk e kisha kuptuar rëndësinë, vlerën e saj sa ishim së bashku. Kur ajo ndërroi jetë e gjithë bota ime u shpërbë. Bashkëshortët jo rrallë përballen me zënka dhe probleme. Personalisht kam qenë dëshmitar i zënkave mes të bashkëshortëve tek familjarët e mi, ku në shumicën e rasteve janë burrat ata të cilët kanë keqtrajtuar gratë e tyre. Unë nuk e kam keqtrajtuar kurrë gruan time, pasi e kam dashur shumë atë. Edhe pse tani jetoj i vetëm, e di se gruaja ime dhe unë do të jemi përsëri së bashku në botën tjetër.
Unë sinqerisht shpresoj ta kem bërë atë të lumtur dhe që ajo të ketë qenë e kënaqur me mua. Kam bërë përpjekjet e mia më të mira për të trajtuar atë në mënyrën më të mirë të mundshme. Ndihem shumë i vetmuar pa të. Ata njerëz të cilët janë duke më lexuar, i këshilloj që t’i trajtojnë gratë e tyre në mënyrën më të mirë. Vetëm kur të ndahet nga ju do ta kuptoni se sa keni qenë të varur nga ajo dhe se sa shumë do të ndiheni të humbur e të braktisur. Ju duhet të bëni atë të ndihet si një mbretëreshë për aq sa e keni këtë mundësi.” /tesheshi.com/
