Siç njoftojnë mediat britanike, Anders Breivik mund të lejohet të vizitohet nga një femër e njohur si “Victoria,” me të cilën ai ka shkëmbyer qindra letra. Ajo pretendon se ka rënë në dashuri me të burgosurin.
Mundësinë që ai të vizitohet nga e dashura ia siguron fitorja në gjyqin e djeshëm.
Anders Breivik, një ekstremist norvegjez i së djathtës ekstreme, u dënua në vitin 2012 për vrasjen e dhjetërave njerëzve.
Një gjykatë vendore vendosi dje se mbajtja e tij në izolim në burg ia ka cenuar të drejtat njerëzore.
Sipas gjykatës, është shkelur neni 3 i Konventës Europiane për të Drejtat e Njeriut, që ka të bëjë me ndëshkimin jonjerëzor apo degradues.
Në vendimin e gjykatës thuhet se “Ndalimi i trajtimit jonjerëzor apo degradues përfaqëson një vlerë fundamentale në një shoqëri demokratike. Kjo vlen gjithashtu në trajtimin e terroristëve dhe vrasësve.”
The Times raporton se vendimi hap rrugën që femra e cila pretendon të jetë e dashuruar me Breivik-un
ta vizitojë atë në burg. Asaj i është refuzuar deri më tani kërkesa për ta takuar atë.
Anders Breivik po e vuan dënimin në burgun Skien, ku atij i lejohet njëfarë korrespondence, por nuk i lejohet të komunikojë me ekstremistë të tjerë.
Një vrasës i dhjetërave personave të pafajshëm, i papenduar asnjëherë për atë çka ka bërë, për Breivik-un ka patur së fundi një debat mbi arsyet sepse ai nuk cilësohet terrorist. Absurdi shkon më tej, pasi vendimi i djeshëm i gjykatës i jep mundësi atij që burgun e sigurisë së lartë të mund ta kthejë në një lloj hoteli. /tesheshi.com/
