Pas një frymëmarrje të lehtë, me tre takime të njëpasnjëshme pa e njohur humbjen, Hamburgu u kthye në formën e tij më shumë se mediokre këtë sezon, duke u turpëruar keqaz në “Allianz Arena”.
E çfarë turpërimi për skuadrën ku aktivizohet Mërgim Mavraj që nga janari: Bajerni i Mynihut e bën shoshë. Më keq se kaq nuk bëhet: 8-0!
Kjo qe dhurata më e mirë për trajnerin Carlo Ancelotti, në të 1000-tën ndeshje si trajner i parë në stol. Kjo qe fitorja e 591-të e teknikut italian në karrierën e tij të gjatë në drejtim të ekipeve të ndryshme.
Polaku Lewandowski do të shënonte tre prej golave, e pos tij do të shënonte dy gola Coman, për të shtuar një të Vidal-it, një të Alaba-së e një të Robben-it.
Hamburgu përfundoi me këtë humbje në vendin e 16-të të klasifikimit të Bundesligës, por mund të rrëshqasë dhe më poshtë, në varësi të rezultatit të ndeshjes së nesërme të Ingolstadtit. Në të kundërt, Bajerni i Mynihut është si gjithnjë i pari, pesë pikë mbi Lajpcigun, që fitoi 3-1 ndaj Këlnit.
Mes ndeshjeve të tjera të javës së 22-të të Bundeligës, Bajer Leverkuseni humbi 0-2 në shtëpi ndaj Mainzit, e Borusia e Dortmundit fitoi 0-3 në fushën e Frajburgut. /tesheshi.com/
