Interi ka shkërmoqur këtë pasdite Atalantën; një humbje dërrmuese, 7-1, për ekipin që kishte surprizuar gjatë këtij sezoni të kampionatit italian me paraqitjet e mira.
Gasperini zbriti në “Giuseppe Meazza” me djemtë e tij në një sfidë të drejtpërdrejtë me vendasit në luftën për të qenë mes katër vendeve të para të klasifikimit të Serisë A. Një sfidë që ka vajtur aq keq sa më s’bëhet, me pesë gola të pësuar vetëm në pjesën e parë.
Etrit Berisha nuk kishte pësuar gol në tre ndeshjet e fundit në kampionat, ndaj Krotones, Napolit dhe Fiorentinës, teksa sot e nxori topin nga rrjeta sa për të tre takimet së bashku.
Moment mjaft i keq për të, ashtu si për Atalantën, që është parakaluar nga Interi në renditje.
Napoli, me një tjetër shqiptar në të, Elseid Hysajn, fitoi po këtë pasdite 3-0 ndaj Krotones, dhe kështu mori përkohësisht vendin e dytë.
Veseli, mbrojtësi tjetër i përfaqësueses kuqezi, do të duhet të ngushëllohet me faktin se me qëndrimin në stol shmangu çdo përgjegjësi në humbjen 4-0 të Empolit në fushën e Kievos.
Peskara pësoi një humbje më shumë. Në vend të fundit, skuadra e Memushajt nuk mundi të bënte dot asgjë ndaj Udinezes, edhe pse luante në fushën e vet. Rezultati 1-3 reflekton dorëzimin e Peskarës në luftën për mbijetesë. /tesheshi.com/
