“Pasardhësit” e Holokaustit: Izraeli, jo aparteid me palestinezët!

Qeveria gjermane kritikoi të mërkurën një raport të Amnesty International, i cili akuzoi Izraelin për apartheid ndaj palestinezëve.

“Ne refuzojmë terma si aparteidi dhe përqendrimi i njëanshëm në politikën izraelite. Kjo nuk po ndihmon për të zgjidhur çështjen e Lindjes së Mesme”, tha një zëdhënës i Ministrisë së Jashtme të Berlinit.

Njëkohësisht ai theksoi se në një kohë kur në Evropë ka një rritje të antisemitizmit, duhet pasur edhe më shumë kujdes me vlerësimet.

“Kushdo që mbron të drejtat e njeriut duhet të jetë i kujdesshëm që të mos nxisë në mënyrë të pavetëdijshme antisemitizmin me deklaratat e tyre”, tha një zëdhënës i qeverisë gjermane.

“Gjermania vazhdon të refuzojë ndërtimin e vendbanimeve të reja hebraike në territoret e pushtuara palestineze dhe është në favor të një zgjidhjeje me dy shtete”, tha Ministria e Jashtme e Berlinit.

Gjithashtu vlerësohet se disa lëvizje të autoriteteve izraelite, si prishja e shtëpive palestineze në territoret e pushtuara, “shkelin ligjin ndërkombëtar”.

Amnesty International akuzoi të martën Izraelin se po ndjek një politikë aparteidi kundër palestinezëve në territoret e pushtuara bazuar në një politikë “ndarjeje, kapjeje dhe përjashtimi”, për të cilën tha se ishte një krim kundër njerëzimit.

Grupi i të drejtave të njeriut me bazë në Londër tha se raporti prej 211 faqesh bazohej në hulumtimin dhe analizën ligjore të sekuestrave izraelite të tokës dhe pronës palestineze, vrasjet e paligjshme, zhvendosjet e detyruara dhe mohimet e shtetësisë.

Izraeli thotë se raporti, i dyti në më pak se një vit në të cilin AI akuzon Izraelin për ndjekjen e një politike aparteidi, “përforcon dhe riciklon gënjeshtrat” ​​e grupeve të urrejtjes dhe se raporti është krijuar për të “ndezur zjarrin antisemitizëm”. /tesheshi.com/