Nga Blendi Gashi
Rreth 5 milionë euro, Kosova duhet t’i paguajë, shtypshkronjës shtetërore austriake “AG Staatsdruckerei”. Kështu vendosi të enjten Gjykata e Arbitrazhit në Paris, sipas vendimit të së cilës, shteti i Kosovës duhet ta paguajë këtë shumë si kompensim për ndërprerje të parakohshme të kontratës për prodhimin e pasaportave biometrike, si dhe për disa pagesa të pakryera.
Kontrata u ndërpre, pasi që Ministria e Punëve të Brendshme dhe pala austriake u mashtruan nga Natali Veliaj, pronare e kompanisë “Consulting EU”.
Qeveria e Kosovës duhej të paguante nëpërmjet kompanisë së Velisë, e cila të hollat nga qeveria, i mori, por nuk e pagoi kompaninë austriake.
Kompania austriake pretendonte se MPB-ja nuk ia pagoi 1.4 milion euro për furnizimin me pasaporta, kurse shteti i Kosovës pretendonte se i pagoi paratë sipas marrëveshjes, por të cilat humbën diku rrugës.
Lidhur me zhdukjen e 1.4 milion eurove, shtetasja gjermane, Natali Veliaj, në vitin 2014, u dënua nga drejtësia kosovare me 12 vjet burg dhe 25 mijë euro gjobë.
Ndërsa, Fisnik Balaj, i akuzuari i dytë në rastin e pasaportave është dënuar me 11 vjet burg dhe 25 mijë euro gjobë.
S’deklarohen ministri e ish-ministri
Si pasojë e mos përgjegjësisë së MPB-së që u drejtua atë kohë nga ministri i PDK-së Bajram Rexhepi, shteti ynë duhet nga xhepi i varfër të heq edhe 5 milionë euro, si pasojë e politikanëve të papërgjegjshëm.
Përkundër se buxheti i shtetit do të dëmtohet, si edhe në rastet tjera nuk pritet të ndëshkohen fajtorët kryesorë, pra që janë njerëzit përgjegjës të shtetit që kanë udhëhequr këtë proces që në fund po rezulton fatal.
Njeriu kryesorë që udhëheqi procesin, ish zyrtari i lartë i PDK-së, Bajram Rexhepi, ish ministër i Brendshëm, tani i larguar nga politika, pasi vendosi të merrej me profesionin e tij, të mjekut, nuk ka dashur as të komentoj dëmin që u shkaktua edhe pse në atë kohë i printe procesit të pasaportave bimoetrike.
Bajram Rexhepi ka thënë se nuk do që të komentojë më për ngjarjet politike.
Rexhepi ka deklaruar për mediat kosovare se është larguar nga politika dhe se nuk merret më me çështjet që lidhen me politikën.
“Mos më kontaktoni më se jam larguar nga politika dhe nuk merrem me këto çështje”, është përgjigjur Rexhepi.
Por, përkundër largimit nga politika, Rexhepi si ish ministër do të duhej të jepte versionin e tij, dhe të mos ik nga përgjegjësia.
Rrugn e heshtjes dhe mos dhnies s llogaris si ish ministri Rexhepi e ka ndjekur edhe ministri aktual i Brendshm Skender Hyseni i LDK-së i cili nuk ka dashur fare të deklarohet për rastin në fjalë.
Ramush Haradinaj: 5 milionë eurot t’i paguajnë Bajram Rexhepi dhe Skender Hyseni
Ndërsa, ish ministri Rexhepi dhe ministri aktual Hyseni heshtin për dënimin që ka marrë Kosova që t’i paguajë kompanisë austriake 5 milionë euro, opozita kërkon që personat në fjalë të përgjigjen pasi janë njerëzit kyç.
Kreu i AAK-së, Ramush Haradinaj, ka thënë se për 5 milionët që Kosova duhet t`i paguaj në Gjykatën e Arbitrazhit në Paris për pasaportat biometrike, duhet të përgjigjen Skënder Hyseni dhe Bajram Rexhepi.
Ai ka thënë se ky është dënimi i radhës që qeveritarët aktualë po i bëjnë qytetarëve të Kosovës.
“Dënimi i Kosovës me 5 milionë euro në Gjykatën e Arbitrazhit në Paris për skandalin e pasaportave është edhe një goditje në xhepin e qytetarëve të Kosovës. Këto para le t’i paguajnë milionerët Skënder Hyseni e Bajram Rexhepi dhe po ashtu milionerët e Ministrisë së Punëve të Brendshme, të punësuar aty pa kurrfarë kriteri profesional, por në baza krejtësisht klanore dhe partiake”, ka deklaruar Haradinaj.
Thaçi, Rexhepi e Hyseni të përgjigjen jo veç me burg, por t’iu konfiskohet edhe pasuria
Analisti politik, Faik Krasniqi, thotë se skandali i pasaportave që buxhetit të Kosovës do t’i kushtojë 5 milionë euro nuk guxon të heshtet, siç janë heshtur deri më tash me qindra e qindra skandale të tjera.
“Duhet të kërkohet përgjegjësi nga ish ministri Bajram Rexhepi, ministri Skënder Hyseni dhe ish kryeministri Hashim Thaçi! Prej këtij skandali kanë përfituar këta njerëz e shumë të tjerë, prandaj duhet të gjithë këta të përgjigjen, jo vetëm me burg por edhe me konfiskim të pasurive. Por, duke e marrë parasysh se tash e 17 vite udhëhiqemi nga njerëzit e njëjtë që deri më tash po na vjedhin e po na plaçkisin, për tre ditë edhe ky skandal do harrohet siç janë harruar edhe me mijëra skandale të tjera, në Kosovën e zaptuar tash e 17 vite”, thotë Krasniqi, për tesheshi.com.
Ja kur u nënshkrua kontrata për pasaportat
Me 5 nëntor 2010 është data kur MPB-ja e udhëhequr nga Bajram Rexhepi publikoi një njoftim për kontratë në lidhje me furnizimin me pasaporta elektronike.
Tenderin në vlerë prej 14 milionë e 127 mijë, e 3 euro e 24 cent u nënshkrua me 17 qershor 2011 me kompaninë austriake OeSD.
Aktualisht Kosova furnizohet me pasaporta që i prodhon kompania gjermane “G&D”.
Ndryshe, Kosova duhet të paguajë borxhin në afat prej 14 ditësh dhe nuk ka të drejtë ta ankimojë vendimin. /tesheshi.com/
